تەرى مەن ءجۇن وڭدەۋ سالاسىندا قانداي جوبالار ىسكە اسىرىلادى

استانا. قازاقپارات - اۋىل شارۋاشىلىعى ءمينيسترى ەربول قاراشوكەيەۆ ەلىمىزدە تەرى مەن ءجۇن وڭدەۋ سالاسىنداعى پروبلەمانى اتادى، دەپ حابارلايدى قازاقپارات ءتىلشىسى.

اۋىل شارۋاشىلىعى ونىمدەرىن قايتا وڭدەۋدىڭ ەڭ پروبلەمالى سالالارىنىڭ ءبىرى تەرى مەن ءجۇندى وڭدەۋگە قاتىستى. تەرى وڭدەۋ سالاسىندا 9 كاسىپورىن جۇمىس ىستەپ تۇر. 2022 -جىلى ءىرى قارا مال بويىنشا 3,4 ميلليون تەرى ءوندىرىلىپ، ونىڭ شامامەن % 14 (462 مىڭ) وڭدەلدى، % 5,2 (179,5 مىڭ) ەكسپورتتالدى، ال قالعان % 81 (2,8 ميلليون) وڭدەلمەي قالدى. ال ۇساق مال بويىنشا 7,9 ميلليون تەرى ءوندىرىلدى. سۇرانىستىڭ بولماۋىنا بايلانىستى ۇساق مالدىڭ تەرىسىن وڭدەۋ جانە ەكسپورتتاۋ ىسكە اسىرىلعان جوق، - دەدى ە. قاراشوكەيەۆ سەناتتا وتكەن ۇكىمەت ساعاتىندا.

ونىڭ ايتۋىنشا، بىلعارى شيكىزاتىنىڭ ەكسپورتىن تەجەۋشى فاكتور 1 توننا ءۇشىن 200 ەۋرو ەكسپورتتىق باج بولدى. قازىرگى كەزدە ۇساق مال بويىنشا ەكسپورتتىق باج تولىعىمەن الىنىپ تاستالدى، ال ءىرى قارا مال تەرىسىنەن وڭدەلگەن بىلعارىعا قاتىستى 100 ەۋروعا دەيىن تومەندەتىلدى. وعان قوسا، ينۆەستيتسيالىق سۋبسيديالار قاعيدالارىنا بىلعارى شيكىزاتى مەن ءجۇندى قايتا وڭدەۋ جونىندەگى جاڭا كاسىپورىنداردى سالۋعا جانە جاڭعىرتۋعا ارنالعان ينۆەستيتسيالىق سالىمداردىڭ 25 پايىزىن وتەۋدى كوزدەيتىن جاڭا پاسپورت دايىندالدى.

سونىمەن قاتار ول جەكە ءارى شاعىن شارۋا قوجالىقتارىندا وندىرىلگەن تەرى ساپاسىنىڭ تومەندىگى جانە ءتيىستى تالاپتارعا سايكەس كەلمەۋى شيكىزات وڭدەۋ سالاسىنىڭ دامىماۋىنا اسەر ەتىپ وتىرعانىن ايتتى.

بۇل ماسەلەنىڭ شەشىمىنە توقتالساق، تەرىنىڭ ساپاسىنا قارامايتىن وندىرىستەردى دامىتۋ كەرەك. ماسەلەن، جەلاتين نەمەسە ازىق قوسپالارىن ءوندىرۋ ەسكەرىلگەن. وسى باعىتتا جالپى قۋاتى 12 مىڭ توننا ءىرى قارا مالدىڭ تەرىسىن وڭدەپ، جەلاتين وندىرەتىن 3 ينۆەستيتسيالىق جوبا ىسكە اسىرىلىپ جاتىر. 2,2 مىڭ توننا كولەمىندە ازىق قوسپالارىن ءوندىرۋ ءۇشىن ۇساق مال تەرىسىن وڭدەيتىن 1 جوبا قامتىلدى. اتالعان جوبالاردى جۇزەگە اسىرۋ ارقىلى تەرى وڭدەۋدە ءبىراز ماسەلەنى شەشەمىز، - دەدى ۆەدومستۆو باسشىسى.

بۇدان بولەك، ءمينيستردىڭ ايتۋىنشا، ءجۇن وڭدەۋدەگى پروبلەمالار دا تەرى ماسەلەسىنە ۇقساس، ياعني شيكىزات ساپاسى تومەن.

رەسپۋبليكادا جىل سايىن 40 مىڭ تونناعا جۋىق قوي ءجۇنى وندىرىلەدى، ونىڭ تەك 33% نەمەسە 13,3 مىڭ تونناسىن قايتا وڭدەۋگە پايدالانۋعا بولادى. ءجۇننىڭ 67 پايىزى قىلشىق جانە جارتىلاي قىلشىقتى ءجۇن، ول ءىس جۇزىندە وڭدەلمەيدى ءارى توقىما ونەركاسىبىندە سۇرانىسى جوق. كيىز جانە كيىزدەن جاسالعان اياق كيىم فابريكالارى از عانا بولىگىن وڭدەيدى. بيىل اقپان ايىندا اۋىل شارۋاشىلىعى مينيسترلىگى ءجۇندى ەكسپورتتاۋعا كەدەندىك باجدى الىپ تاستاۋعا باستاماشىلىق جاسادى. ماسەلەن، اقتوبە وبلىسىندا قۋاتتىلىعى جىلىنا 2,1 مىڭ توننالىق قىلشىقتى ءجۇندى وڭدەيتىن «قازفيلتەك» ج ش س ينۆەستيتسيالىق جوبانى ىسكە قوسپاق. ول جىلۋ وقشاۋلاعىش ماتەريالداردى دايىنداۋ ءۇشىن پايدالاناتىن بولادى. جوبانى ىنتالاندىرۋ ءۇشىن سۋبسيديالاۋ قاعيدالارىنا ينۆەستيتسيالىق سالىمداردىڭ % 25 وتەۋ ۇلەسى بار ءجۇندى وڭدەۋ جونىندەگى پاسپورت ەنگىزىلگەن، - دەدى ۆەدومستۆو باسشىسى.

ە. قاراشوكەيەۆ سونداي- اق ەت وڭدەۋ كاسىپورىندارىنىڭ پروبلەماسىن اتاعان بولاتىن.