تۇركىستاندا ۇلتتىق قۇرىلتايدىڭ جۇمىس سەكسيالارىنىڭ وتىرىسى باستالدى
ۇلتتىق قۇرىلتايدىڭ ەكىنشى وتىرىسى پرەزيدەنت قاسىم- جومارت توقايەۆتىڭ قاتىسۋىمەن ەرتەڭ، 17-ماۋسىم كۇنى وتەتىنىن بۇعان دەيىن حابارلاعان بولاتىنبىز.
ءاربىر سەكسيا وتىرىسىنا قوعام قايراتكەرلەرى، پارلامەنت دەپۋتاتتارى، قوعامدىق كەڭەستەر مۇشەلەرى، ب ا ق باسشىلارى، ساراپشىلار قاتىسىپ، كونسوليداتسيا، مادەني- رۋحاني دامۋ، سونداي- اق ءبىلىم جانە عىلىم ماسەلەلەرىن تالقىلاۋدا.
«قوعامدىق كونسوليداتسيا» سەكسياسىنىڭ وتىرىسىندا ۇلتتىق قۇرىلتاي مۇشەلەرى ازاماتتىق قوعامدى دامىتۋ جانە ەتنوسارالىق بىرلىكتى نىعايتۋ، قوعامدىق بىرلەستىكتەردىڭ قىزمەتىن زاڭنامالىق رەتتەۋ، ۇلتتىق يدەولوگيالىق كۇن ءتارتىبىن قالىپتاستىرۋ ەرەكشەلىكتەرى، وڭىرلەردەگى قوعامدىق كەڭەستەردىڭ ءرولى ماسەلەلەرىنە باسا نازار اۋداردى.
بۇدان بولەك، حالىق اراسىندا قۇقىقتىق ساۋاتتىلىقتى ارتتىرۋ ماسەلەسى كوتەرىلدى. ساراپشىلار نوتاريۋستاردى، ادۆوكاتتاردى، پوليتسيا قىزمەتكەرلەرىن، پروكۋراتۋرا مەن سوت ورىنداۋشىلارىن تارتا وتىرىپ، ازاماتتار ءۇشىن قوعامدىق كونسۋلتاتسيالار ۇيىمداستىرۋ تاجىريبەسىن قايتا جانداندىرۋدى ۇسىندى.
ۇلتتىق قۇرىلتاي مۇشەلەرى وتاندىق ب ا ق پەن مەديا- كونتەنتتى دامىتۋعا، ولاردىڭ قوعامدىق كونسوليداتسيانى نىعايتۋ قۇندىلىقتارىن ىلگەرىلەتۋدەگى رولىنە قاتىستى پىكىرلەرىمەن ءبولىستى.
«مادەنيەت. ونەر. رۋحانيات» جۇمىس سەكسياسىنىڭ وتىرىسىندا مادەني- رۋحاني دامۋ ماسەلەلەرى قارالدى.
ۇلتتىق قۇرىلتاي مۇشەلەرى قازىرگى زامانعى اۆتورلاردىڭ ادەبي شىعارمالارىنداعى ۇلتتىق قۇندىلىقتاردى ىلگەرىلەتۋ مەن وتاندىق ادەبيەت پەن كينونى دامىتۋ ماسەلەلەرىن قوزعادى. سونىمەن قاتار مۋزەيلەردىڭ، مادەني ورتالىقتار مەن كىتاپحانالاردىڭ، اسىرەسە اۋىلدىق جەرلەردەگى جۇمىسى، سونداي- اق جاس تالانتتاردى ىلگەرىلەتۋ جانە كرەاتيۆتى يندۋستريانى دامىتۋدى قولداۋ تاقىرىپتارى كوتەرىلدى.
جاس ۇرپاقتى تاربيەلەۋ مەن ولاردىڭ بىلىمگە دەگەن قۇشتارلىعىن وياتۋ، سالاۋاتتى ءومىر سالتىن، ەڭبەكقورلىقتى، پاتريوتيزمدى ناسيحاتتاۋ ماسەلەلەرىنە كوڭىل ءبولىندى. بۇقارالىق سپورتتى دامىتۋ جونىندە ۇسىنىستار جاسالدى.
«ءبىلىم جانە عىلىم» جۇمىس سەكسياسىنىڭ وتىرىسى ءتۇس قايتا وتەدى. وندا سيفرلىق جانە جاڭا تەحنولوگيالىق شىنايىلىقتا قالىپتاسىپ جاتقان جاس ۇرپاقتىڭ ەرەكشەلىكتەرى كەڭ كولەمدە تالقىلانادى دەپ كۇتىلۋدە.
شارا بارىسىندا ۇرپاقتار ساباقتاستىعىن ساقتاۋ، جوعارى ءبىلىم بەرۋدەگى رەفورمالاردى جەتىلدىرۋ، ونىڭ ىشىندە جوعارى وقۋ ورىندارىن باسقارۋدىڭ زاماناۋي تەتىكتەرىن ەنگىزۋ جانە وقىتۋشىلار مارتەبەسىن ارتتىرۋ ماسەلەلەرى تالقىلانادى.
سەكسيا جۇمىسى اياسىندا ورتا ءبىلىم بەرۋ، اسىرەسە اۋىلدىق جەرلەردە مەكتەپ ينفراقۇرىلىمىن جاقسارتۋ ماسەلەلەرى قارالادى.
جۇمىس سەكسيالارى وتىرىستارىنىڭ قورىتىندىسى بويىنشا ۇلتتىق قۇرىلتاي مۇشەلەرىنىڭ ۇسىنىستارىن مەملەكەتتىك ورگاندارمەن بىرلەسىپ ىسكە اسىرۋ جونىندەگى ءىس- شارالاردىڭ ارنايى جوسپارى ازىرلەنبەك.
