ماعان دەسە اتۋ جازاسى بولسىن، ءبىراق قارجى ۇرلادى دەپ ايىپتاماڭىزدار - ارىستانبەك مۇحامەدي ۇلى

استانا. قازاقپارات - ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى سوت الدىنداعى سوڭعى سوزىندە كەز كەلگەن جازاعا كەلىسەتىنىن ايتتى، ءبىراق اقشا جىمقىردى دەپ ايىپتاماۋدى سۇرادى، دەپ حابارلايدى قازاقپارات ءتىلشىسى.

ءبىز «التىن ادام» ارتەفاكتىلەرىن ساقتاپ، ەلگە جەتكىزدىك. الايدا، ول ۇرلانىپ كەتكەن دۇنيە سەكىلدى، جاعىمسىز سيپات الىپ وتىر. «التىن ادام» قازىر ۇلتتىق مۋزەيدە تۇر. وسىنداي ارەكەتتەن كەيىن كىم «التىن ادامنىڭ» كورمەسىن وتكىزگىسى كەلەدى؟ ەشقانداي تاراپ پروبلەمالىق تاريحى بار كورمەنى قابىلداعىسى كەلمەيدى، - دەدى ارىستانبەك مۇحامەدي ۇلى سوتتاعى سوڭعى سوزىندە.

ول كەز كەلگەن جازانى وتەۋگە دايىن ەكەندىگىن ايتتى، ءبىراق ورىنسىز ايىپتاماۋدى سۇرادى.

مەن كەز كەلگەن جازاعا كەلىسەمىن، ءتىپتى اتۋعا دا، تەك قارجى ۇرلادى دەپ ايىپ تاقپاڭىزدار. ار بارىنەن قىمبات. قازاقتا ماقال بار، «ولىمنەن ۇيات كۇشتى» دەگەن. 60 جاسىما دەيىن ءومىردىڭ قىزىعىن دا، شىجىعىن دا تاتتىم، ءبىراق لايىقتى ءومىر سۇردىم، - دەدى ا. مۇحامەدي ۇلى.

«ءبىر جىلدان استام قازاقستاندىقتار جانە الەم «التىن ادام» كورمەسىنە قاتىستى قىلمىستىق ءىستىڭ بارىسىن باقىلاپ كەلەدى. بيىل 17- ساۋىردە سوتتىڭ العاشقى وتىرىسىندا مەن ايتقام، مەملەكەت باسشىسىنىڭ تاپسىرماسىن ورىنداۋ ماقساتىندا مەن ءۇندىستاننان «التىن ادامدى» ەلگە امان-ساۋ الىپ كەلدىم. ەلشىلىك باسقا دا قۇزىرلى ورگانداردىڭ كومەگىمەن لوكداۋننىڭ ءدال الدىندا قۇندى دۇنيەنى قازاقستانعا جەتكىزدىك. مەن زاڭ بۇزعان جوقپىن جانە كىنامدى تولىق مويىندامايمىن. ونى بۇعان دەيىن دە ايتقام،» - دەدى ول.

سونداي- اق، تاعىلعان ايىپتاردىڭ بىرەۋى دە دالەلدەنبەگەنىن ايتىپ وتىر.

وسىدان 2 اي بۇرىن باستالعان سوت پروتسەسى مەنىڭ عانا ەمەس، باسقا دا ايىپتىلاردىڭ سوزدەرىنىڭ شىنايىلىعىن كورسەتتى. مەنىڭ شىنايىلىعىمنىڭ دالەلى - ايىپتاۋ اكتىسىنىڭ جاڭا تۇجىرىمى. وندا پروكۋرور ۇرلاۋ، ءسوز بايلاسۋ جانە زاڭدى بۇزۋ فاكتىلەرى بويىنشا بىردە-ءبىر دالەل كەلتىرمەيدى. بارلىق شاقىرىلعان كۋاگەرلەر قارجى جىمقىرۋ فاكتىسىنىڭ بولماعانىن ايتتى. ەشقانداي زاڭسىز ارەكەتتەردىڭ جوقتىعىن سەنىمدى تۇردە قايتالادى، - دەدى ارىستانبەك مۇحامەدي ۇلى.

ەسكە سالا كەتەيىك، وتكەن جىلى مامىردا سوت سانكسياسىمەن سول كەزدەگى ۇلتتىق مۋزەي ديرەكتورى ارىستانبەك مۇحامەدي ۇلى قاماۋعا الىندى.

سىبايلاس جەمقورلىققا قارسى ءىس- قيمىل قىزمەتى مۋزەيدىڭ ەكس- باسشىسىنا «التىن ادامنىڭ» الەم مۋزەيلەرىنە شەرۋى» حالىقارالىق كورمەسىن وتكىزۋ جونىندەگى مەملەكەتتىك ساتىپ الۋ تۋرالى شارت اياسىندا قازاقستان رەسپۋبليكاسى ۇلتتىق مۋزەيىنىڭ لاۋازىمدى ادامدارىنا جانە باسقا دا تۇلعالارعا بيۋدجەت قاراجاتىن جىمقىرۋ بەلگىلەرى بويىنشا ايىپ تاعىپ، تەرگەپ- تەكسەرۋدى جۇرگىزگەن ەدى.

سوت ارىستانبەك مۇحامەدي ۇلىن ءۇيقاماققا اۋىستىرۋدان باس تارتتى.

سونداي- اق، ارىستانبەك مۇحامەدي ۇلى مەن سىبايلاستارىنا قانداي ايىپ تاعىلعانىن جازعان بولاتىنبىز.

كەزەكتى سوت وتىرىسىندا ارىستانبەك مۇحامەدي ۇلى ءوز كىناسىن مويىندامايتىنىن ايتتى.

ال، انتيكور «ديپلومات» قوناقۇيىنە قاتىستى ارىستانبەك مۇحامادي ۇلىن تەرگەۋ اياقتالعانىن حابارلاعان ەدى.