الماتىدا ءال- فارابي داڭعىلى جوندەۋدەن وتەدى
الماتى اكىمدىگىنىڭ مالىمەتىنشە، بيىل ءال- فارابي داعىلىنىڭ تورايعىروۆ كوشەسىندەگى جولايرىقتان دوستىق داڭعىلىنداعى جولايرىققا دەيىنگى ارالىقتاعى جالپى ۇزىندىعى 9,3 شاقىرىمدى قۇرايتىن بولىكتە ورتاشا جوندەۋ جۇمىستارىن جۇرگىزۋ جوسپارلانعان.
«قازىرگى ۋاقىتتا جوندەۋ جۇمىستارى كولىك قوزعالىسىن ءىشىنارا شەكتەۋ ارقىلى جۇرگىزىلۋدە. جوندەۋ جۇمىستارى اياسىندا جولداعى جيەكتاستاردى تەگىستەۋ قاراستىرىلعان. تەگىستەۋ كەزىندە جيەكتاستار الىنىپ، جولدىڭ بويىندا ءتيىستى دەڭگەيدە قايتا ورناتىلادى. جوندەۋ جۇمىستارى ءجۇرىپ جاتقان اۋماقتا 34500 م جيەكتاس بولسا، ونىڭ تەك 7683 مەترى عانا الىنىپ، سول جەرگە قايتا ورناتىلادى»، - دەپ حابارلادى اكىمدىك.
مەردىگەرلەر اتاپ وتكەندەي، جيەكتاس اۋىستىرىلمايدى، سەبەبى ولار گرانيتتەن جاسالعان جانە وتە ءتوزىمدى. ولار تەك تەگىستەلەدى.
«تەگىستەۋ دەگەنىمىز - قيسايعان جيەكتاستاردى الىپ، قايتا ورنىنا ورناتۋ. جول قوزعالىسى كەزىندە جيەكتاستارعا ماشينالار ءتيىپ كەتۋى مۇمكىن نەمەسە ارنايى تەحنيكا قار تازالاۋ كەزىندە قيسايتىپ كەتۋى مۇمكىن. جيەكتاس پەن جول جابىنىنىڭ اراسىنداعى ساڭىلاۋلار جول بەتىندە جارىقتاردىڭ پايدا بولۋىنا الىپ كەلۋى مۇمكىن. جۇمىس ساپاسىن ارتتىرۋ ءۇشىن اسفالتبەتون جابىنىن توسەر الدىندا جيەكتاستار تەگىس ءارى تىك تۇرۋى ءتيىس»، - دەدى مەردىگەر كومپانيا وكىلى.
ەسكە سالساق، ءال- فارابي داڭعىلى بۇعان دەيىن 2010 -جىلى جوندەۋدەن وتكەن.
«جوندەۋارالىق مەرزىمنىڭ وتۋىنە بايلانىستى تەكسەرۋ جۇمىستارى جۇرگىزىلىپ، ناتيجەسىندە جول بويىندا شۇڭقىر، ويىلعان، جارىلعان، وتىرعان جەرلەر انىقتالىپ، جولدىڭ جاعدايى بويىنشا تەحنيكالىق قورىتىندى جاسالدى. تەحنيكالىق قورىتىندى نەگىزىندە اتالعان ۋچاسكەلەردى ورتاشا جوندەۋ جۇمىسى جوسپارىنا قوسىلدى»، - دەپ حابارلادى اكىمدىكتەن.
