بەلارۋس كومپانيالارى وتاندىق جۇك تاسىمالداۋشىلارىن نارىقتان ىعىستىرىپ جاتىر - دەپۋتات

استانا. قازاقپارات - بەلارۋس كومپانيالارى وتاندىق جۇك تاسىمالداۋشىلارىن نارىقتان ىعىستىرىپ جاتىر. بۇل جايىندا ۇكىمەت باسشىسىنىڭ ءبىرىنشى ورىنباسارى رومان سكلياردىڭ اتىنا دەپۋتاتتىق ساۋال جولداعان ءماجىلىس دەپۋتاتى ەرجان بەيسەنبايەۆ ايتتى، دەپ حابارلايدى قازاقپارات ءتىلشىسى.

«2022 -جىل بويى قازاقستاندىق تاسىمالداۋشىلار شەتەلدىك رۇقسات بلانكىلەرى نەگىزىنەن بىزگە كوشىپ كەلگەن رەسەيلىك جانە بەلارۋستىق تاسىمالداۋشىلارىنا بەرىلىپ جاتقاندىعىنان زارداپ شەگىپ كەلدى. ال بيىلعى جىل باسىنان بەرىلگەن شەتەلدىك رۇقسات بلانكىلەرى جونىندە تىزىمگە كوڭىل اۋدارساق، ۇلكەن ايىرماشىلىقپەن «ينتەراۆتوترانس»، «تەحنوبەل»، «ينتەرترانساۆتو- قوستاناي» ج ش س الدا تۇر. بۇلار - بۇرىنعى بەلارۋستىق Jenty, Primum كومپانيالارى. قازىرگى تاڭدا، بەلارۋس تاسىمالداۋشىلارىنىڭ قۇقىقتارى ءبىزدىڭ كاسىپكەرلەرمەن تەڭ تۇر. ال بۇل ءبىزدىڭ تاسىمالداۋشىلارىمىز تاسىمالدايتىن تاۋارلاردىڭ كولەمىنە قاتتى اسەر ەتەدى. ولار ءبىزدىڭ تاسىمالداۋشىلارىمىزعا باسەكەلەستىك تۋعىزا وتىرىپ، قازاقستاندىق كاسىپورىنداردى جۇك تاسىمالداۋ نارىعىنان ىعىستىرىپ جاتىر»، - دەدى دەپۋتات ءماجىلىستىڭ جالپى وتىرىسىندا.

ونىڭ اتاپ وتۋىنشە، ەۋروپا ەلدەرى دە جوعارىدا اتالعان بەلارۋس كومپانيالارى شىن مانىندە قازاقستاندىق ەمەستىگىن بىلەدى. سونىڭ سالدارىنان وتكەن جىلى ەۋروپا ەلدەرى، اتاپ ايتقاندا پولشا مەن ليتۆا قازاقستانعا رۇقسات بلانكىلەرىن بەرمەگەن.

«ارينە، ءبىز بەلارۋس پەن رەسەيگە ەش ءىس- شارا قولدانا المايمىز. ولار ءىرى كومپانيالار بولىپ جۇمىس جاسايدى. ال بىزدە شاعىن جانە ورتا كومپانيالار. جوعارىدا باياندالعاندى تۇيىندەي كەلە، «اق جول» ق د پ فراكسياسى ىشكى نارىق پەن وتاندىق تاسىمالداۋشىلاردىڭ مۇددەلەرىن قورعاۋ ماقساتىندا شاعىن جانە ورتا بيزنەسكە رۇقسات بلانكىلەرى جاعىنان ارتىقشىلىق بەرۋىمىز كەرەك دەپ سانايدى. بۇل حالىقارالىق تاجىريبەگە ساي جانە ەۋرازيالىق ەكونوميكالىق وداقتىڭ ءتارتىبىن بۇزبايدى»، - دەدى ەرجان بەيسەنبايەۆ.