ۇلتتىق قوردان بەرىلەتىن قاراجاتتى ءبىر وتباسىنىڭ بالالارى بىرىكتىرىپ جاراتا الاما

None
استانا. قازاقپارات - «ۇلتتىق قور - بالالارعا» جوباسى اياسىندا ءبىر وتباسى بالالارىنىڭ ءبارى 18 جاسقا تولعاندا عانا ولاردىڭ قاراجاتتارىن بىرىكتىرۋگە بولادى.

بۇل تۋرالى ءماجىلىستىڭ جالپى وتىرىسىندا زاڭناما جانە سوت-قۇقىقتىق رەفورما كوميتەتىنىڭ مۇشەسى ءۇنزيلا شاپاق ايتتى، دەپ حابارلايدى قازاقپارات ءتىلشىسى.

كەيبىر زاڭنامالىق اكتىلەرگە ۇلتتىق قوردان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋ بارىسىندا دەپۋتات داۋلەت مۇقايەۆ ءبىر وتباسى بالالارىنىڭ قاراجاتىن بىرىكتىرۋ مۇمكىندىگىنە قاتىستى ساۋال قويعان ەدى.

«ۇيدە اعايىندى بالالار بولادى. ۇلكەنى 17 جاستا دەلىك. 3500 دوللاردى 18 جىلعا ەسەپتەگەندە، ول ءبىر جىلعا 200 دوللار عانا الادى. بۇل قاراجات ءبىلىم الۋعا دا، ءۇي الۋعا دا جەتپەيدى. ونىڭ ارتىنان ەرىپ كەلە جاتقان باۋىر-قارىنداستارىنا اقشاسىن اۋدارۋ مۇمكىندىگى بار ما؟»، - دەپ سۇرادى داۋلەت مۇقايەۆ.

ساۋالعا جاۋاپ بەرگەن ءماجىلىس دەپۋتاتى ءۇنزيلا شاپاقتىڭ ناقتىلاۋىنشا، بالا 18 جاسقا تولعاننان كەيىن شوتتاعى اقشاسى 10 جىل ساقتالادى.

«ءبىر وتباسىنىڭ بالالارىنىڭ ءبارى 1 جىلدا 18 جاسقا تولمايدى. سوندىقتان سوڭىنان ەرگەن باۋىرلارىنىڭ جاسى 18 گە تولعان ساتتە عانا قاراجاتتارى بىرىكتىرىلەدى. وسىعان دەيىن قولدانىلىپ كەلگەن زەينەتاقى قورىنان اقشا الۋ تەتىگىمەن بىردەي بولادى. بۇل زاڭدا كوزدەلگەن»، - دەدى دەپۋتات.


سوڭعى جاڭالىقتار