ماجىلىستە ۇلتتىق قوردان بالالارعا تولەم جاساۋعا قاتىستى قۇجات تالقىلانىپ جاتىر

استانا. قازاقپارات - ءماجىلىستىڭ جالپى وتىرىسىندا كەيبىر زاڭنامالىق اكتىلەرگە ۇلتتىق قوردان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى ءبىرىنشى وقىلىمدا تالقىلانىپ جاتىر، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسىن ىسكە اسىرۋ بويىنشا مۇددەلى مەملەكەتتىك ورگاندارمەن بىرلەسىپ، 2024-جىلدان باستاپ «ۇلتتىق قور - بالالارعا» جوباسىن ىسكە قوسۋدىڭ نەگىزگى تەتىكتەرى ازىرلەندى. ازىرلەنگەن جوباعا سايكەس ۇلتتىق قوردىڭ ينۆەستيتسيالىق تابىسىنىڭ جارتىسىن جىل سايىن ەكى ماقساتتا پايدالانۋ ءۇشىن كامەلەت جاسىنا تولماعان بالالارعا تەڭدەي ءبولۋ ۇسىنىلادى. ءبىرىنشى - تۇرعىن ءۇي جاعدايلارىن جاقسارتۋ نەمەسە تۇرعىن ءۇي ساتىپ الۋ. بۇل ماقساتتا قاراجاتتى تەك قازاقستان اۋماعىندا پايدالانۋعا رۇقسات ەتىلەدى»، - دەدى قۇجاتتى تانىستىرعان زاڭناما جانە سوت-قۇقىقتىق رەفورما كوميتەتىنىڭ مۇشەسى ءۇنزيلا شاپاق.

ونىڭ اتاپ وتۋىنشە، جيناقتالعان قاراجاتقا ەكىنشىدەن ءبىلىم الۋعا بولدى.

«بۇل ماقساتتا بالانىڭ ەل ىشىندەگى وقۋ ورىندارىمەن قاتار شەتەلدىك وقۋ ورنىندا دا وقۋ اقىسىن تولەۋىن شەكتەمەۋ قاجەت دەپ پايىمدايمىز. ءبىر سوزبەن ايتقاندا، بۇل كامەلەتكە جاڭا تولعان قازاقستاندىقتاردىڭ ەرەسەك ومىرگە قادام باسقان كەزىندە باستاپقى كاپيتالدى الۋعا مۇمكىندىك بەرەدى. ياعني، دانا بابالارىمىز «بالانىڭ وسكەن بەسىگى - دۇنيەنىڭ كەڭ ەسىگى» دەمەكشى، جاس ۇرپاقتىڭ دۇنيە ديدارىن كەڭىنەن تانۋىنا جول اشىلادى. حالقىمىزدا «بالالى ۇيرەك كولدەن كەتپەس، بالالى جاس ەلدەن كەتپەس» دەگەن دانا تۇجىرىم بار. تيىسىنشە، قازاقستان رەسپۋبليكاسىنىڭ ازاماتتىعىنان ايىرىلعان، جوعالتقان نە اۋىسقان كەزدە تولەمدەرگە تالاپ قويۋ قۇقىعى دا جوعالادى»، - دەدى ءماجىلىس دەپۋتاتى.