قىتايدا قازاق جاستارى «قارا جورعانى» ەرەكشە بيلەپ، توي كوركىن قىزدىردى
الەۋمەتتىك جەلىدە تاراپ جاتقان وسى ەرەكشە توي ۆيدەوسىنان ءبىر توپ قىز-جىگىتتەرمەن بىرگە جاڭا تۇسكەن كەلىننىڭ دە «قارا جورعا» بيلەپ جۇرگەنىن كورۋگە بولادى. ولار ەرەكشە ىنتامەن، شەبەر ءارى جاراسىمدى بيلەپ، كەشتىڭ كوركىن قىزدىرعان.
اسىلىندە «قارا جورعا» ءبيىنىڭ ءتۇپ نۇسقاداعى قيمىل-قوزعالىسى باياۋ ىرعاقتى بولىپ كەلەدى. قىز بەن جىگىتتىڭ اراسىنداعى ىنتىق كوڭىل مەن ىڭكار سەزىم نازدى كورىنىسكە ارقاۋ ەتىلگەن. ال بۇل جولعى تويدا جاستار ءبيدى زاماناۋي قيمىلدارمەن تۇرلەندىرىپ، ءساتتى شوۋ-قويىلىم جاساعان سەكىلدى.
ەسكە سالا كەتەيىك، بۇگىنگى كۇنى جۇرت اراسىندا «قازاقتا ءبي بولماعان»، «قارا جورعا» ءبىزدىڭ ءبي ەمەس» دەگەن سەكىلدى پىكىرى قۇلاققا شالىنىپ قالىپ جاتادى. ال انىعىندا «قارا جورعا» - ورتامىزعا قايتا ورالعان جادىگەرىمىز. قازاقستان اۋماعىندا بۇل ءبي تۋرالى ايتىلاتىن ناقتىلى دايەكتى دەرەكتەرگە جۇگىنسەك، 1975-جىلى شىققان «قازاق سوۆەت ەنتسيكلوپەدياسىنىڭ» 6-توم، 477-بەتىندەگى «قارا جورعا» - قازاق حالىق ءبيى» دەگەن انىقتاما بولسا، تاعى ءبىرى ارحيۆتىك قۇجاتتاردا مۇحتار اۋەزوۆتىڭ 1934-جىلى قويىلعان «ايمان-شولپان» سپەكتاكلىندە «قارا جورعا» ءبيىنىڭ ۇلكەن ساحناعا تۇڭعىش رەت كوتەرىلگەنى تۋرالى قۇندى دەرەك كەزدەسەدى. سونىمەن بىرگە الاشتىڭ ارداقتى اقىنى، بەلگىلى قوعام قايراتكەرى ءىلياس جانسۇگىروۆتىڭ XX عاسىردىڭ باسىندا جارىق كورگەن «جولداستار» اتتى شىعارماسىندا دا حالىق ءبيى «قارا جورعا» تۋرالى انىق جازىلعان. اتالعان شىعارماداعى مالىمەتتەرگە قاراعاندا «قارا جورعانىڭ» 1915-1916-جىلداردىڭ وزىندە قازاق ورتاسىندا كەڭ تارالعان ءبي ەكەنىن اڭعارۋعا بولادى.
ال قازاقتىڭ دەرەكتى كينوسىنىڭ نەگىزىن قالاۋشى كينورەجيسسەرى، قازاق ك س ر حالىق ءارتيسى وراز ابىشيەۆتىڭ 1974-جىلى تۇسىرىلگەن، اتاقتى ابسەنتكە ارنالعان «ابسەنت - سىن ارابا ي باككارى» اتتى دەرەكتى فيلمىندە دە «قارا جورعا» ءبيىنىڭ كورىنىستەرى كەزدەسەدى.
Посмотреть эту публикацию в Instagram
اۆتور: باقىتجول كاكەش
