الماتى وبلىسىندا رەپرەسسيا جىلدارى اتىلعان ادامداردىڭ سۇيەگى تابىلدى

None
استانا. قازاقپارات - رەپرەسسيا جىلدارى اتىلعان ادامداردىڭ سۇيەگى تابىلدى. اۋماقتا تەك ادام سۇيەگى ەمەس، اتۋ جازاسىنا كەسىلگەندەردىڭ جەكە قۇرالدارى دا انىقتالىپ جاتىر، - دەپ حابارلايدى Almaty.tv.

تەلەارنا مالىمەتىنشە، الماتى وبلىسى جاڭالىق اۋىلىندا ادام سۇيەكتەرى بۇعان دەيىن دە بىرنەشە مارتە تابىلعان ەدى. كوبىنە سۋ تارتىپ، قۇبىر جۇرگىزگەندە شىعاتىن تاريحي ماتەريالدار بيىل العاش رەت مەملەكەتتىك جوبا اياسىندا زەرتتەلىپ وتىر. ارحەولوگتاردىڭ ايتۋىنشا، 14 كۇننىڭ ىشىندە 15 شاقتى ادامنىڭ دەنەسى شىققان اۋىلدا ءالى دە 4 مىڭنان اسا سۇيەك جاتۋى مۇمكىن.

سۇيەكتەردەن بولەك، التىن ءتىس، تۇيمەلەر، كيىم مەن اياقكيىم بولىكتەرى دە تابىلدى، ءتىپتى جادىگەردىڭ كوبى جاقسى ساقتالعان. تەك ادام سۇيەكتەرى ءبىر كەزدە كوشەدە جۇرگىزىلگەن جوندەۋ جۇمىستارى كەزىندە بۇلىنگەندىكتەن، كوبىنە شاشىراپ كەتكەن.

بۇل جاقتان 1934-54-جىلدارى شىققان «ستالين جولى» گازەتىنىڭ بولىگى تابىلدى. تاريحشىلاردىڭ ايتۋىنشا، قارىپ تانىپ، گازەت وقىعانىنا قاراپ، بۇل ماڭدا ءبىلىمدار ادامداردىڭ اتىلۋى مۇمكىن.

«كريميناليستىك، سوتتىق-انتروپولوگيالىق تالداۋ سەكىلدى عىلىمي جۇمىستاردى جۇزەگە اسىرادى. ال ءۇشىنشى كەزەڭدە وسى تابىلعان سۇيەك قالدىقتارىنا د ن ق اناليزىن جاساۋعا الماتىداعى گەنەتيكا ينستيتۋتى مەن ۆيلنيۋس قالاسىنداعى گەنەتيكا ينستيتۋتى اتسالىسادى»، - دەدى تاريح عىلىمدارىنىڭ دوكتورى، پروفەسسور دوسبول بايعۇناقوۆ.

تابىلعان ماتەريالداردىڭ ىشىندە ايەل ادامعا تيەسىلى زاتتار دا بار. ال دەنەلەردىڭ كوبى 1,5 مەتردەن-اق جەر بەتىنە شىعىپ جاتقان. سوعان قاراعاندا، ادامداردى ارنايىلاپ جەرلەمەگەن، تەك اتقان سوڭ كومە سالعان دەگەن بولجام بار.

مۇنداي تولىققاندى زەرتتەۋگە سۇيەنگەن قازبا جۇمىسى قازاقستاندا العاش رەت ءوتىپ جاتىر. بۇعان دەيىن رەپرەسسيا قۇرباندارى تاقىرىبىنداعى ساراپتامالىق-ارحەولوگيالىق جۇمىس ءتىپتى ت م د ەلدەرىندە دە رەسمي اتقارىلماعان. ال ەسىك قورىق-مۇراجايى مەن تاريحشى-عالىمدار بىرلەسكەن جوبانى ەلدىڭ مادەنيەت مينيسترلىگى قولدادى.

سوڭعى جاڭالىقتار