قىتايدا نەكەگە تۇرۋ مەن تۋۋ كورسەتكىشى ازايدى

None
بەيجىڭ. قازاقپارات - وتكەن جىلى قىتايدا نەكە قيۋدىڭ ەڭ تومەن سانى تىركەلدى، بۇل جاعداي بالا تۋۋ كورسەتكىشىنىڭ تومەندەۋىمەن تۇسپا-تۇس كەلىپ، ۇكىمەتتىڭ ەلدەگى دەموگرافيالىق داعدارىسقا قاتىستى الاڭداۋشىلىعىن تۋدىردى، دەپ حابارلايدى قازاقپارات CNN- گە سىلتەمە جاساپ.

قىتايدىڭ ازاماتتىق ىستەر مينيسترلىگىنىڭ مالىمەتىنشە، 2022-جىلى ەلدە شامامەن 6,83 ميلليون جۇپ ۇيلەنگەن. بۇل 2021-جىلى تىركەلگەن 7,63 ميلليون نەكەدەن شامامەن %10,5 عا از جانە مينيسترلىكتىڭ «نەكە» ستاتيستيكاسىن جاريالاي باستاعان 1986-جىلدان بەرى رەكوردتىق تومەن كورسەتكىش.

ەلدە ەڭ كوپ نەكە 2013-جىلى تىركەلدى. ول كەزدە 13 ميلليوننان استام قىتايلىق جۇپ ۇيلەندى. بۇل - 2022-جىلمەن سالىستىرعاندا ەكى ەسەدەي كوپ.

سونداي-اق، قىتاي حالقىنىڭ سانى 2022-جىلى 60 جىلدان استام ۋاقىت ىشىندە العاش رەت قىسقارعانى اتاپ ءوتىلدى. بىلتىر تىركەلگەن 1000 ادامعا شاققاندا نەبارى 6,77 تۋىلۋ - 1949-جىلى كوممۋنيستىك قىتاي قۇرىلعاننان بەرگى ەڭ تومەنگى كورسەتكىش.

قىتاي شەنەۋنىكتەرى نەكە سانىنىڭ ازايۋى مەن ەلدەگى تۋۋ كورسەتكىشىنىڭ تومەندەۋى اراسىندا تىكەلەي بايلانىس بار ەكەنىن ايتىپ وتىر.

ساناق مالىمەتىنشە، 2020-جىلى ەلدەگى ازاماتتاردىڭ ءبىرىنشى نەكەگە تۇرۋىنىڭ ورتاشا جاسى ون جىل بۇرىنعى 24,89 جاسپەن سالىستىرعاندا 28,67 جاستى قۇرادى.

سوڭعى جىلدارى قىتايلىق شەنەۋنىكتەردىڭ ەلدەگى نەكە مەن تۋۋ دەڭگەيىنىڭ تومەندەۋ تەندەنتسياسىن كەرى بۇرۋعا باعىتتالعان كۇش-جىگەرى ەكونوميكالىق جانە الەۋمەتتىك پروبلەمالار جاعدايىندا ازىرگە ناتيجە بەرگەن جوق.

سوڭعى جاڭالىقتار