استانادا التى مەكتەپكە تاريحي تۇلعالاردىڭ ەسىمى بەرىلدى

استانا. قازاقپارات - ەلورداداعى التى مەكتەپكە ۇلى تۇلعالاردىڭ ەسىمى بەرىلدى. بۇل تۋرالى استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ ءمالىم ەتتى، دەپ حابارلايدى قازاقپارات ءتىلشىسى.

اتاپ ايتقاندا، ەلوردا اكىمدىگىنىڭ 12- ماۋسىمداعى 511-1116№ قاۋلىسىنا سايكەس كەلەسى مەكتەپتەرگە ۇلى تۇلعالاردىڭ ەسىمى بەرىلدى:

1№ مەكتەپ-ليتسەيگە كەڭەس وداعىنىڭ باتىرى، اۆياتسيا گەنەرال-مايورى تالعات بيگەلدينوۆتىڭ ەسىمى بەرىلدى. ول نەبارى 23 جاسىندا كەڭەس وداعىنىڭ ەكى مارتە باتىرى اتانعان. سوعىستان كەيىنگى جىلدارى دا وتاندىق اسكەري-اۋە كۇشتەرىندە ءتۇرلى باسشىلىق لاۋازىمداردا ابىرويمەن قىزمەت ەتتى.

70№ مەكتەپ-ليتسەيگە كورنەكتى مەملەكەت جانە قوعام قايراتكەرى تەمىربەك جۇرگەنوۆتىڭ ەسىمى بەرىلدى. ول حالىق اعارتۋ كوميسسارى بولىپ، ۇلتتىق مادەنيەتىمىزدى جاڭعىرتۋعا، جاستاردىڭ ءبىلىم الۋىنا كوپ جاعداي جاسادى. قازاق جەرىنىڭ شەكاراسىن بەلگىلەۋ ىسىنە بەلسەنە ارالاسىپ، ەل مۇددەسى جولىندا كوپ قىزمەت ەتتى.

92№ مەكتەپ- ليتسەيگە گەولوگيا-مينەرالوگيا عىلىمدارىنىڭ دوكتورى، اكادەميك، ق ر ۇلتتىق عىلىم اكادەمياسىنىڭ العاشقى قۇرىلتايشىلارىنىڭ ءبىرى، قازاقستاننىڭ ەڭبەك سىڭىرگەن عىلىم قايراتكەرى اقجان ءال-ماشانيدىڭ اتى بەرىلدى. ول گەولوگيا، مينەرالوگيا عىلىمدارىمەن شۇعىلدانۋمەن قاتار، ۇلى ۇستاز، عالىم ءابۋ ناسىر ءال-فارابيدى زەرتتەپ، كوپ عىلىمي دەرەك قالدىرعان.

65№ مەكتەپ-گيمنازياعا الاش قوزعالىسىنىڭ بەلدى مۇشەسى، قازاق پوەزياسىنىڭ كورنەكتى وكىلى ماعجان جۇمابايەۆتىڭ ەسىمى بەرىلدى. ول - ءوزىنىڭ وتتى جىرلارىمەن جانە ناقتى ىستەرىمەن حالىقتىڭ رۋحىن وياتۋعا، ازاتتىق جولىنداعى ارمان-مۇراتتارىن ىسكە اسىرۋعا جان-تانىمەن قىزمەت ەتىپ، اياۋسىز رەجيمنىڭ قۇربانىنا اينالعان تۇلعا.

88№ مەكتەپ-ليتسەيگە قازاقستاننىڭ حالىق جازۋشىسى، بەلگىلى اقىن قادىر مىرزا ءالىنىڭ ەسىمى بەرىلدى. ول – 50 دەن استام پوەزيالىق جيناقتىڭ اۆتورى. كوپ جىل بويى بالالار ادەبيەتىنىڭ دامۋىنا ۇلەس قوسقان. الەمدىك كلاسسيكتەردىڭ شىعارمالارىن قازاق تىلىنە اۋدارسا، ءوزىنىڭ ءبىراز توپتامالارى مەن تاڭداۋلى ولەڭدەرى اعىلشىن، فرانتسۋز، نەمىس، پولياك، بولگار، ۆەنگەر، فين تىلدەرىنە اۋدارىلدى.

1№ ونەر مەكتەبىنە قازاقتىڭ ايگىلى كۇيشى- كومپوزيتورى، دومبىراشى، شەرتپە كۇي مەكتەبىنىڭ نەگىزىن قالاۋشىلاردىڭ ءبىرى، حالىق كۇي ونەرىنىڭ كلاسسيگى تاتتىمبەت قازانعاپ ۇلىنىڭ ەسىمى بەرىلدى. تاتتىمبەتتىڭ بىزگە 40 تان استام كۇيى جەتكەن. تۋىندىلارى قازاق كۇي ونەرىنىڭ التىن قازىناسى سانالادى.