اۋىل شارۋاشىلىعىندا ساناق جۇرگىزىلەدى - ۇكىمەت وتىرىسى

None
استانا. قازاقپارات - پرەمەر-مينيستر ءاليحان سمايىلوۆ ەلدە اۋىل شارۋاشىلىعى ساناعىن جۇرگىزۋدى، وعان دايىندىقتى بيىل باستاۋ كەرەگىن ايتتى، دەپ حابارلايدى قازاقپارات.

«اۋىل شارۋاشىلىعى كورسەتكىشتەرىن قالىپتاستىرۋ ادىستەمەسى بويىنشا دا شەشىلمەگەن سۇراقتار بار. ستراتەگيالىق جوسپارلاۋ جانە رەفورمالار اگەنتتىگىنىڭ اقپاراتى بويىنشا رەسمي دەرەككوزدەردەگى مالىمەتتەردە ورتا ەسەپپەن %20 الشاقتىق بار. ءدال وسى ماسەلەنى شەشۋ ءۇشىن اۋىل شارۋاشىلىعىندا ساناق جۇرگىزىلۋى كەرەك»، - دەدى پرەمەر-مينيستر ۇكىمەتتىڭ بۇگىنگى وتىرىسىندا.

ونىڭ ايتۋىنشا، قازاقستاندا ءجۇن مەن بىلعارى وڭدەۋ سالاسىن دامىتۋدا ايتارلىقتاي الەۋەت بار. ءبىراق جوعارى قايتا وڭدەلگەن ءونىم شىعارۋدىڭ ورنىنا شيكىزات تومەن باعامەن ەكسپورتتالىپ جاتىر.

«بۇل - كۇردەلى پروبلەما. ولاردى شەشۋ ءۇشىن جۇيەلى تاسىلدەر كەرەك. جەرگىلىكتى اتقارۋشى ورگاندار اۋىسپالى ەگىستەگى، ەڭ الدىمەن، سۋارمالى جەرلەردەگى جەم-ءشوپ داقىلدارىنىڭ ۇلەسىن كەڭەيتۋى قاجەت. جايىلىم جەرلەردىڭ ونىمدىلىگىن ارتتىرۋ كەرەك. اۋىل شارۋاشىلىعى مينيسترلىگى وزىق حالىقارالىق تاجىريبەنى، ونىڭ ىشىندە سيفرلاندىرۋدى ەسكەرە وتىرىپ، ۆەتەريناريا جۇيەسىن رەفورمالاۋدىڭ جول كارتاسىن ازىرلەۋى كەرەك»، - دەدى ءا. سمايىلوۆ.

سونىمەن بىرگە اۋىل شارۋاشىلىعى مينيسترلىگىنە ستراتەگيالىق جوسپارلاۋ جانە رەفورمالار جونىندەگى اگەنتتىكپەن بىرگە اۋىل شارۋاشىلىعىندا ساناق جۇرگىزۋ، ونىڭ ىشىندە اقپاراتتىق جۇيەلەردى جاڭعىرتۋ جونىندەگى جول كارتاسىن ازىرلەۋ تاپسىرىلدى.

«ساناققا دايىندىق جۇمىستارىن بيىل باستاۋ كەرەك»، - دەدى پرەمەر-مينيستر.

سوڭعى جاڭالىقتار