15:12, 13 - ماۋسىم 2023 | GMT +5
ماۋلەن اشىمبايەۆ يراننىڭ ءدىن كوشباسشىلارىن بيىلعى سەزد حاتشىلىعىنىڭ وتىرىسىنا شاقىردى
استانا. قازاقپارات - سەنات ءتوراعاسى ماۋلەن اشىمبايەۆ يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ءالي اكبار دجوۋكارمەن كەزدەستى. سۇحبات بارىسىندا ەكى ەل اراسىنداعى ىنتىماقتاستىقتى ودان ءارى نىعايتۋ جانە سەرىكتەستىكتى كەڭەيتۋ ماسەلەلەرى تالقىلاندى، دەپ حابارلايدى قازاقپارات سەناتتىڭ باسپا ءسوز قىزمەتىنە سىلتەمە جاساپ.
ماۋلەن اشىمبايەۆ يران قازاقستاننىڭ يسلام الەمىندەگى جان-جاقتى ىنتىماقتاستىق ورناتىلعان جاقىن سەرىكتەستەرىنىڭ ءبىرى ەكەنىن ايتتى. سونداي-اق پالاتا سپيكەرى قازاقستان پرەزيدەنتى قاسىم-جومارت توقايەۆتىڭ 2022-جىلى يرانعا جاساعان ساپارى ەكىجاقتى قارىم-قاتىناسقا ايتارلىقتاي سەرپىن بەرگەنىن تىلگە تيەك ەتتى.
سونىمەن قاتار سەنات ءتوراعاسى قازاقستان پارلامەنتارالىق بايلانىستى ودان ءارى دامىتۋعا مۇددەلى ەكەنىن ايتتى جانە ەلىمىزدە مەملەكەت باسشىسىنىڭ باستاماسىمەن ىسكە اسىرىلىپ جاتقان كەشەندى رەفورمالارعا نازار اۋداردى.
سونداي-اق ول الەمدىك جانە ءداستۇرلى دىندەر ليدەرلەرىنىڭ سەزىنە جەكە توقتالىپ، يراننىڭ ءدىن كوشباسشىلارىن بيىل كۇزدە وتەتىن سەزد حاتشىلىعىنىڭ مەرەيتويلىق وتىرىسىنا قاتىسۋعا شاقىردى.
