ءورت سەمەيگە جەتە مە؟

None
استانا. قازاقپارات - سەمەي وڭىرىندە ءورتتىڭ بەتى قايتتى. وتتىڭ جاڭا وشاقتارى جوق. جاڭادان تاعايىندالعان توتەنشە جاعدايلار ءمينيسترى سىرىم ءشارىپحانوۆ «ەگەر جەل تۇرماسا، بىرەر كۇندە ءورتتى تولىق سوندىرەمىز» دەيدى.

دەگەنمەن ارقانى كەڭگە سالۋعا كەلمەيدى. رەزەرۆاتتىڭ كەي بولىگىندە ءالى دە بەت قاراتپاي تۇرعان اۋماقتار بار.

قورعان قونىسباي ۇلى

- قالىپتاسقان جاعدايدى باجايلاۋ ءۇشىن ءبىز مينيسترمەن بىرگە تىكۇشاققا بەتتەپ بارامىز. بۇعان دەيىن ءورت رەزەرۆاتتىڭ ورتالىق جانە شىعىس بولىگىندە ءورشىپ تۇر ەدى. ەندى قالاي؟ مۇنى قازىر بىرگە بايقاپ كورەمىز.

سىرىم ءشارىپحانوۆ كۇردەلى كەزەڭدە مينيستر بولىپ تاعايىندالدى. بىردەن وتتىڭ ورتاسىنا ءتۇستى. يىعىنا ارتىلعان جۇك اۋىر. قايتكەندە دە ءورتتى ءوشىرۋ كەرەك. بۇل مەملەكەت باسشىسىنىڭ تاپسىرماسى.

سەمەي ورمانىنىڭ جالپى اۋماعى 650 مىڭ گەكتار. سەگىزىنشى ماۋسىمنان بەرى سونىڭ 60 مىڭ گەكتارى جاندى. بۇگىندە وت 43 مىڭ گەكتار اۋماقتا بايقالادى. مينيستر جاعدايدى اۋەدەن باقىلاپ، سوسىن كۇردەلى اۋماقتارعا باردى. جەكە قۇراممەن كەزدەستى. تاۋلىگىنە تەك 2-3 ساعات قانا مىزعىپ الىپ جۇرگەن جىگىتتەردىڭ جاعدايىن سۇرادى. جاسىراتىنى جوق، جىگىتتەر شارشاعان. ءبىراق بىلدىرمەيدى. ءوزىمىز ءتۇتىن اراسىندا 10 مينۋت جۇرگەنىمىزدە ءورت ءسوندىرۋدىڭ قانشالىقتى قيىن ەكەنىن سەزىندىك. ال، بۇل ازاماتتاردىڭ ءتىلسىز جاۋمەن كۇرەسىپ جاتقانىنا وسىمەن ءتورتىنشى تاۋلىك.

سوڭعى جاڭالىقتار