قاسىم-جومارت توقايەۆتىڭ اتىنا كوڭىل ايتۋ جەدەلحاتتارى كەلىپ ءتۇستى

بۇل تۋرالى قازاقپارات اقوردانىڭ باسپا ءسوز قىزمەتىنە سىلتەمە جاساپ حابارلايدى.

رەسەي پرەزيدەنتى ۆلاديمير پۋتين قاسىم-جومارت توقايەۆقا جانە قازاقستان حالقىنا قازاقستاننىڭ شىعىس ايماعىنداعى الاپات ورمان ورتىنە بايلانىستى ءوزىنىڭ قولداۋىن جانە جىلى لەبىزىن ءبىلدىردى.

- تابيعات اپاتىنىڭ اۋىر سالدارى ەڭسەرىلىپ، زارداپ شەككەن اۋماقتار قالىپتى ومىرگە ورالاتىنىنا سەنىمدىمىن، - دەپ جازىلعان رەسەي پرەزيدەنتىنىڭ جەدەلحاتىندا.

وزبەكستان پرەزيدەنتى شاۆكات ميرزيەيەۆ الاپات ورمان ءورتى سالدارىنان ادامداردىڭ قازا تاپقانى تۋرالى سۋىت حاباردى تەرەڭ كۇيزەلىسپەن قابىلداعانىن جەتكىزگەن.

- وسىنداي قايعىلى ساتتە سىزگە جانە باۋىرلاس ءارى دوستاس قازاقستان حالقىنا كوڭىل ايتامىن. قازا تاپقانداردىڭ تۋىستارى مەن جاقىندارىنىڭ قايعىلارىنا ورتاق ەكەنىمدى جەتكىزۋىڭىزدى سۇرايمىن. بۇل توتەنشە جاعداي جاقىن ارادا تولىعىمەن ەڭسەرىلەتىنىنە سەنىمدىمىن، - دەلىنگەن وزبەكستان پرەزيدەنتىنىڭ جەدەلحاتىندا.

قىرعىزستان پرەزيدەنتى سادىر جاپاروۆ قاسىم-جومارت توقايەۆقا ورمان ءورتى سالدارىنان ادامداردىڭ قازا تابۋىنا بايلانىستى قايعىرىپ كوڭىل ايتتى.

- ورنى تولماس قايعىعا ورتاقتاسا وتىرىپ، قازا تاپقان قازاقستاندىقتاردىڭ تۋىستارى مەن جاقىندارىنا كوڭىل ايتامىن، - دەپ جازىلعان قىرعىزستان پرەزيدەنتىنىڭ جەدەلحاتىندا.

تاجىكستان پرەزيدەنتى ەمومالي راحمون ۇكىمەت پەن دوستاس قازاقستان حالقىنىڭ كۇش-جىگەرىمەن ءورتتىڭ جاقىن ارادا اۋىزدىقتالاتىنىنا سەنىم ءبىلدىردى.

- اباي وبلىسىنداعى اۋقىمدى ءورت سالدارىنان ادامداردىڭ قازا تاپقانى جونىندەگى قايعىلى حاباردى تەرەڭ كۇيزەلىسپەن قابىل الدىق. بارشا باۋىرلاس قازاقستان حالقىنا، قازا تاپقان ازاماتتاردىڭ تۋىستارى مەن جاقىندارىنا قايعىرىپ كوڭىل ايتامىز، - دەپ جازدى تاجىكستان پرەزيدەنتى.

تۇرىكمەنستان پرەزيدەنتى سەردار بەردىمۇحامەدوۆ ادام شىعىنىنا اكەپ سوقتىرعان اباي وبلىسىنداعى الاپات ورمان ورتىنە بايلانىستى قاسىم-جومارت توقايەۆقا كوڭىل ايتتى.

- تۇرىكمەنستان حالقى مەن ۇكىمەتى اتىنان جانە ءوز اتىمنان قازا تاپقان ازاماتتاردىڭ تۋىستارى مەن جاقىندارىنا كوڭىل ايتامىن، سونداي-اق زارداپ شەككەن اۋماقتىڭ تەزىرەك قالپىنا كەلۋىنە تىلەكتەستىك بىلدىرەمىن، - دەلىنگەن سەردار بەردىمۇحامەدوۆتىڭ جەدەلحاتىندا.

ازەربايجان پرەزيدەنتى يلحام اليەۆ اباي وبلىسىنداعى الاپات ورمان ءورتى سالدارىنان ادامداردىڭ قازا تاپقانى جانە اۋىر شىعىنعا اكەپ سوقتىرعانى تۋرالى حاباردى اۋىر كۇيزەلىسپەن قابىلداعانىن جازدى.

- وسى قايعىلى جاعدايعا بايلانىستى ءوزىمنىڭ جانە ازەربايجان حالقىنىڭ اتىنان قازا تاپقانداردىڭ وتباسىنا جانە جاقىندارىنا، بۇكىل قازاقستان حالقىنا كوڭىل ايتامىن. سونداي-اق تابيعات اپاتى بولعان اۋماقتىڭ تەزىرەك قالپىنا كەلۋىنە تىلەكتەستىك بىلدىرەمىن، - دەلىنگەن يلحام اليەۆتىڭ جەدەلحاتىندا.

تۇركيا پرەزيدەنتى رەجەپ تاييپ ەردوعان تۇركيا حالقىنىڭ اتىنان جانە ءوز اتىنان قازا تاپقانداردىڭ وتباسى مەن تۋىستارىنا قايعىرىپ كوڭىل ايتتى.

- وسى قايعىلى ساتتە قازا تاپقانداردىڭ وتباسى مەن تۋىستارىنا كوڭىل ايتامىن. تۇرىك حالقىنىڭ اتىنان جانە ءوز اتىمنان زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىن، - دەپ جازىلعان تۇركيا رەسپۋبليكاسى پرەزيدەنتىنىڭ جەدەلحاتىندا.

پاكىستان پرەمەر-ءمينيسترى شاحباز شاريف قازاقستانداعى ورمان ءورتى سالدارىنان 14 ادامنىڭ قازا تابۋىنا بايلانىستى كوڭىل ايتتى.

- پاكىستان ۇكىمەتى مەن حالقىنىڭ اتىنان پرەزيدەنت قاسىم-جومارت توقايەۆقا جانە قازا تاپقان ازاماتتاردىڭ وتباسىنا قايعىرىپ كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋى ءۇشىن دۇعا ەتەمىن، - دەپ جازدى شاحباز شاريف.

كوڭىل ايتۋ جەدەلحاتتارى ءالى دە كەلىپ ءتۇسىپ جاتىر.