ەۆاكۋاتسيالانعان بالالارمەن كەزدەسۋ ءۇشىن اباي وبلىسىنا بارامىن - جاڭا تاعايىندالعان بالالار ومبۋدسمەنى

استانا. قازاقپارات - بۇگىن تاعايىندالعان ق ر بالا قۇقىقتارى جونىندەگى ۋاكىل دينارا زاكيەۆا ەۆاكۋاتسيالانعان بالالارمەن كەزدەسۋ ءۇشىن اباي وبلىسىنا اتتانباق.

بۇل تۋرالى ول بۇگىن ءوزىنىڭ Facebook پاراقشاسىندا جازدى، دەپ حابارلايدى قازاقپارات.

«بۇگىن مەملەكەت باسشىسى مەنى قازاقستان رەسپۋبليكاسىنداعى بالا قۇقىقتارى جونىندەگى ۋاكىل لاۋازىمىنا تاعايىندادى.

قاسىم- جومارت كەمەل ۇلىنىڭ ماعان ارتقان سەنىمى ۇلكەن جاۋاپكەرشىلىك دەپ بىلەمىن.

بۇل - بالالىق شاقتى قورعاۋ، وتباسىلاردى قولداۋ سالاسىنداعى جاعدايدى جاقسارتۋعا تاپتىرماس مۇمكىندىك. بۇعان بار كۇش- جىگەرىمدى سالامىن.

قازىر جەكەمە سۇراقتار مەن ۇسىنىستار كەلۋدە. ۇسىنىستارىڭىزدىڭ بارلىعىن دا قاراستىرامىن دەپ ۋادە بەرەمىن. ءاردايىم اشىقپىن. وسى جەرگە جەكە تەلەفون نومەرىمدى قالدىرامىن. (تەل: 87058847040) ءوتىنىش، حابارلامانى جازبا تۇرىندە تەك ۋاتساپقا قالدىرساڭىزدار. مىندەتتى تۇردە جاۋاپ بەرەمىن»، - دەدى بالا قۇقىقتارى جونىندەگى ۋاكىل.

سونداي- اق ول سوزىندە بۇگىن ەۆاكۋاتسيالانعان بالالارمەن كەزدەسۋ ءۇشىن اباي وبلىسىنا جول جۇرەتىنىن جەتكىزدى.

«بارشاڭىزعا ءمالىم، مەملەكەت باسشىسى ورتتەن زارداپ شەككەن وتباسىلارعا جاردەماقى تاعايىنداۋ، بالالاردى وقىتۋ ماسەلەسى بويىنشا ارنايى تاپسىرما بەرگەن بولاتىن.

بۇگىن ءورت كەزىندە قازا تاپقان ورمان شارۋاشىلىعى قىزمەتكەرلەرىنىڭ بالالارىمەن جانە ەۆاكۋاتسيالىق پۋنكتتەردەگى بالالارمەن كەزدەسۋ ءۇشىن اباي وبلىسىنا بارامىن.

بالا بارشامىزعا ورتاق. بالا- باقىتىمىز. بالانىڭ قۇقىعىن قورعاۋ ءارقايسىمىزدىڭ مىندەتىمىز.

ءاربىر بالا اتا- اناسىنىڭ بۇگىنگى جاعدايىنا قاراماستان باقىتتى بولۋعا لايىقتى. مەنىڭ جۇمىستاعى باستى ۇستانىمىم وسى»، - دەپ جازدى ول.