مۇنى اقتايتىن ەشقانداي سەبەپ جوق: پرەزيدەنت جاقىنىن جوعالتقانداردان كەشىرىم سۇرادى

سەمەي. قازاقپارات - قاسىم- جومارت توقايەۆ ورتتەن كوز جۇمعان ورمانشىلاردىڭ تۋىستارىنان كەشىرىم سۇرادى، دەپ حابارلايدى قازاقپارات.

«مەن سىزدەرگە كوڭىل ايتۋ ءۇشىن ارنايى كەلدىم. ەكىنشىدەن، جان- جاقتى كومەك كورسەتىلەتىنىن ايتۋعا كەلدىم. قارجىلاي دا، باسقا دا كومەك كورسەتىلەدى. بالالار بالاباقشاعا، جوعارى وقۋ ورىندارىنا قابىلدانادى - ءبارى ورىندالادى. مەن، ارينە، سىزدەرمەن بىرگەمىن. سىزدەر - ەلىمىزدىڭ ازاماتىسىزدار. مەن سىزدەر ءۇشىن جاۋاپتىمىن. مەن مەملەكەت باسشىسى رەتىندە بولعان جاعداي ءۇشىن كەشىرىم سۇرايمىن. وتە اۋىر جاعداي ەكەنىن تۇسىنەمىن. اسىراۋشىلارىڭىزدى، وتاعاسىن، ەڭ جاقىن تۋىستارىڭىزدى جوعالتتىڭىزدار. وكىنىشكە قاراي، ومىردە مۇنداي قايعىلى جايتتار بولادى. مۇنى اقتايتىن ەشقانداي سەبەپ جوق. تاعى دا ايتامىن. مورالدىق جانە ماتەريالدىق كومەك كورسەتىلەدى»، - دەدى مەملەكەت باسشىسى.