امەريكادا ەڭ تانىمال تەرروريست ۋنابومبەر قايتىس بولدى
تەودور كاچينسكي 81 جاسىندا سولتۇستىك كارولينا تۇرمەسىندە قايتىس بولدى، دەپ حابارلايدى قازاقپارات Euronews اگەنتتىگىنە سىلتەمە جاساپ.
Unabomber دەگەن اتپەن بەلگىلى تەودور دجون كاچينسكي 1996 -جىلى پوشتا ارقىلى جاپپاي بومبا جىبەردى دەگەن ايىپپەن قاماۋعا الىنعان.
سوت ونى ءومىر بويىنا باس بوستاندىعىنان ايىردى.
ونىڭ جىبەرگەن بومباسىنان 3 ادام كوز جۇمعان، 20 شاقتى ادام جاراقات الدى.
كاچينسكي 20 جىلعا جۋىق پوليتسياعا ۇستاتپاي، قاشىپ ءجۇردى. كەزىندە ول ىزدەۋدە جۇرگەن ەڭ تانىمال، اككى قىلمىسكەر سانالعان.
ول مەكتەپتە ماتەماتيكاعا جۇيرىك ۆۋندەركيند بولدى، 16 جاسىندا گارۆارد ۋنيۆەرسيتەتىنە ءتۇستى.
ميچيگان ۋنيۆەرسيتەتىندە ماتەماتيكا بويىنشا PhD دارەجەسىن الدى. 25 جاسىندا بەركلي ۋنيۆەرسيتەتىندە ساباق بەرە باستادى، ءبىراق ەكى جىلدان كەيىن جۇمىستان كەتتى.
70- جىلداردىڭ باسىندا ول لينكولنگە (مونتانا شتاتى) كوشىپ كەلىپ، ەلەكتر قۋاتى جانە سۋى جوق لاشىقتا تۇرىپ جاتتى.
كوپ ۇزاماي كاچينسكي «ونەركاسىپ پەن قۇرىلىس اينالاداعى جابايى تابيعاتتى جويىپ جاتقانىنا» ىزا بولىپ، بۇلاي تىنىش ءومىر سۇرە المايتىنىن ءتۇسىندى.
ءسويتىپ 1978 -جىلدان 1995 -جىلعا دەيىن ۋنيۆەرسيتەتتەر مەن اۋە كومپانيالارىنا 16 بومبا پاكەتىن جىبەردى.
17 جىلدان كەيىن ۇستالۋىنا قىلمىسكەردىڭ ءوزى سەبەپشى بولدى.
ول Washington Post جانە New York Times گازەتتەرىنەن «ونەركاسىپتىك قوعام جانە ونىڭ بولاشاعى» اتتى مانيفەسىن جاريالاۋدى تالاپ ەتكەن. وعان FBI مەن ا ق ش باس پروكۋرورى كەلىسىم بەردى.
مانيفەست جاريالانعاننان كەيىن قىلمىسكەردىڭ ىزىنە ءتۇسۋ مۇمكىن بولدى.
FBI كاچينسكيگە Unabom لاقاپ اتىن پايدالاندى (Unabom - ۋنيۆەرسيتەت جانە اۆياكومپانيالاردى بومبالاۋشى).
كەيىنىرەك باسپا ءسوزدىڭ ارقاسىندا لاقاپ ات Unabomber سوزىنە اينالدى.
كاچينسكيدىڭ ادۆوكاتتارى ءولىم جازاسىنا كەسپەس ءۇشىن ونى اقىل- ەسى دۇرىس ەمەس دەپ اقتاۋعا تىرىستى. ال كاچينسكيدىڭ ءوزى ءوزىن جىندى ساناعان جوق.
ناتيجەسىندە كاچينسكي ەسى دۇرىس دەپ تانىلىپ، كىناسىن مويىنداپ، ءومىر بويىنا باس بوستاندىعىنان ايىرىلدى.
