سەمەي ورمانىنداعى ءورتتى سوندىرۋگە قاراعاندى جانە الماتى وبلىسىنان اسكەريلەر تارتىلدى
قازىرگى ۋاقىتتا اباي وبلىسىندا 3 ۋچاسكەدە: پودنەبەسنوە، ۋسپەنكا اۋىلدارىندا، كاشتاك ورمانشىلىعىندا ءورتتى ءسوندىرۋ جۇمىستارى جالعاسىپ جاتىر.
اەروۆيزۋالدى تەكسەرۋ جۇرگىزىلۋ ۇستىندە.
سونىمەن قاتار، ءورت ورنىنا ارنايى بايلانىس قۇرالدارىمەن جاراقتاندىرىلعان جىلجىمالى باسقارۋ پۋنكتى قوسىمشا جىبەرىلدى.
باسقارۋ ورگانى ول جەردەن توتەنشە جاعداي ايماعىنداعى ءوز فۋنكتسيالارىن اتقارا بەرەدى.
ەسكە سالا كەتەيىك، «سەمەي ورمانى» رەزەرۆاتىندا 8-ماۋسىم كۇنى ءورت شىققان بولاتىن.
«ءورت نايزاعايدىڭ 2 رەت سوعۋىنان تۇتانعان. ءورتتى تەز ارادا اۋىزدىقتاۋ مۇمكىن بولمادى، وعان سەبەپ - «سەمەي ورمانى» رەزەرۆاتىنىڭ تەحنيكاسى بيىك قۇم توبەلەرى ورنالاسقان ايماققا جەتە المادى»، - دەگەن بولاتىن اباي وبلىسى اكىمىنىڭ ورىنباسارى ديميتري گاريكوۆ.
كەيىنىرەك سەمەي ورمانىنداعى ءورتتى سوندىرۋگە جۇمىلدىرىلعان 3 مامان قازا تاپتى.
مەملەكەت باسشىسى قاسىم- جومارت توقايەۆ توتەنشە جاعدايلار ءمينيسترى يۋري يلينگە اباي وبلىسىنداعى وقيعا ورنىنا جەدەل بارىپ، ءورت ءسوندىرۋ جۇمىستارىن باسقارۋ مىندەتىن جۇكتەدى. ۇكىمەتكە جانە اباي وبلىسىنىڭ اكىمدىگىنە قازا تاپقان ورمان شارۋاشىلىعى قىزمەتكەرلەرىنىڭ وتباسىلارىنا بۇكىل كومەكتى كورسەتۋدى تاپسىردى.
سونداي- اق سەمەي قالاسىندا جەرگىلىكتى اۋقىمدا تابيعي سيپاتتاعى توتەنشە جاعداي رەجيمى جاريالاندى.
اباي وبلىسىنداعى ورتكە بايلانىستى جەدەل جەلى اشىلدى.
مەملەكەت باسشىسى قاسىم- جومارت توقايەۆتىڭ 11-13-ماۋسىم كۇندەرى ۆەتنامعا جوسپارلانعان رەسمي ساپارى كەيىنگە شەگەرىلدى.