بۋرابايدا جاڭا كۋرورت ايماعى اشىلادى

استانا. قازاقپارات - اقمولا وبلىسىنىڭ اكىمى ەرمەك مارجىقپايەۆ وڭىردەگى تۋريزم سالاسىنىڭ قالاي دامىپ جاتقانىن ايتتى، دەپ حابارلايدى قازاقپارات ءتىلشىسى.

اكىمنىڭ ايتۋىنشا، وبلىستا تۋريزم سالاسىندا 65 ينۆەستيتسيالىق جوبا ىسكە اسىرىلىپ، سول ارقىلى 200 جۇمىس ورنى قۇرىلعان.

«تۋريزم - ەكونوميكانى دامىتۋدىڭ نەگىزگى سالالارىنىڭ ءبىرى بولىپ قالا بەرەدى. بۇگىنگى تاڭدا ءبىز قازاقستانداعى تۋريزمدى دامىتۋدىڭ بەس درايۆەرىنىڭ قاتارىنا كىرەمىز. شۋچە- بۋراباي كۋرورت ايماعى وبلىسىمىز بويىنشا تۋريست كوپ كەلەتىن كوشباسشى سانالادى. بۇل - ءبىزدىڭ ايماققا كەلەتىن بۇكىل تۋريستەردىڭ 85 پايىزى. كۋرورتتىق ايماقتا 9 مىڭنان استام توسەك- ورنى بار 183 نىسان جۇمىس ىستەيدى. وتكەن جىلى وندا 1 ميلليوننان استام تۋريست كەلگەن»، - دەدى وبلىس اكىمى ورتالىق كوممۋنيكاتسيالار قىزمەتىندە وتكەن ەسەپتىك بريفينگتە.

ەرمەك مارجىقپايەۆ بيىل وبلىسقا كەلەتىن تۋريستەر سانى 1 ميلليون 200 مىڭ ادامعا دەيىن ۇلعاياتىنىن ايتتى.

«ياعني، ءبىز 200 جۇمىس ورنىن قۇرىپ، 23 ميلليارد تەڭگەگە 65 ينۆەستيتسيالىق جوبانى ىسكە اسىرۋ ارقىلى تۋريست سانىن تاعى ءبىر شيرەككە ارتتىرامىز. ونىڭ ىشىندە «Akbura Resort» كۋرورت ايماعى جوباسىنىڭ ءبىرىنشى كەزەڭى اياسىندا قوناق ءۇيى بار ماڭىزدى نىسان - قالالىق ورتالىقتى اشۋ جوسپارلانىپ وتىر. جالپى بيىل شۋچە- بۋراباي كۋرورت ايماعىن دامىتۋعا 64,4 ميلليارد تەڭگە ءبولىندى»، - دەدى ەرمەك مارجىقپايەۆ.