ەكونوميكانى قارجىلاندىرۋ وسكەنىمەن ودان حالىقتىڭ جاعدايى جاقسارىپ كەتكەن جوق - گودۋنوۆا

None
استانا. قازاقپارات - ەكونوميكا سالالارىن قارجىلاندىرۋ وسكەنىمەن ودان حالىقتىڭ جاعدايى جاقسارىپ كەتە قويعان جوق. بۇل تۋرالى ءماجىلىستىڭ جالپى وتىرىسىندا جوعارى اۋديتورلىق پالاتانىڭ ءتوراعاسى ناتاليا گودۋنوۆا ايتتى، دەپ حابارلايدى قازاقپارات ءتىلشىسى.

«مينيسترلىكتەردىڭ دامۋ جوسپارى مەن ولاردىڭ بيۋدجەتتىك باعدارلامالارىندا حالىقتىڭ ءومىر ءسۇرۋ ساپاسىنىڭ وزگەرۋىنە بايلانىستى تۇپكىلىكتى كورسەتكىشتەر جوق. جالپى ىشكى ءونىمنىڭ ءوسۋى، تريلليوندار، توننا، مىڭداعان ك م! ال وسىدان ادامنىڭ ءومىر ساپاسى جاقساردى ما؟ تۇسىنىكسىز! انىقتاۋ مۇمكىن ەمەس! جوق! سەبەبى تاپسىرمانىڭ شارتتارى دۇرىس ايقىندالماعان. ارينە، مەملەكەت باسشىسىنىڭ تاپسىرماسى بويىنشا شاعىن كرەديت بەرۋدىڭ نىسانالى باعدارلامالارى، حالىقتىڭ تابىسىن ارتتىرۋ باعدارلاماسى ىسكە اسىپ جاتىر جانە ونىڭ بارلىعى ناقتى وڭ اسەرگە يە»، - دەدى پالاتا ءتوراعاسى.

ءبىراق ونىڭ اتاپ وتۋىنشە، بۇل - قولدىڭ كۇشىمەن باسقارىلىپ جاتقان شارۋا.

«ال بۇكىل بيۋدجەتتىك جۇيە ادامعا باعدارلانىپ، بەيىمدەلۋى ءتيىس. بيۋدجەتتىك ۇيىمداردى عانا ەمەس، سونىمەن بىرگە ەكونوميكا سالالارىن دا قارجىلاندىرۋ جاڭا جۇمىس ورىندارى مەن جالاقىنى كوتەرۋ تۇرىندە مۋلتيپليكاتيۆتى اسەر بەرۋى ءتيىس. ال بىزدە ەكونوميكا سالالارىن قارجىلاندىرۋ ءوسىپ جاتقانىمەن، حالىقتىڭ جاعدايى بۇدان جاقسارىپ كەتە قويعان جوق»، - دەدى ناتاليا گودۋنوۆا.

مينيسترلىكتەردىڭ جاۋاپكەرشىلىكتى وڭىرلەرگە ىسىرا سالۋعا دەگەن ۇمتىلىسى انىق كورىنەدى.

«وڭىرلىك ءوزىن- ءوزى قامتاماسىز ەتۋ جانە ەل ازاماتتارىنا تەڭ جاعداي مەن مۇمكىندىكتەردى قامتاماسىز ەتۋ قابىلەتى ازىرگە ىسكە اسىرۋ ساتىسىندا. جەرگىلىكتى بيۋدجەتتەردىڭ شىعىسىن ءوز كىرىسىمەن جابۋ مۇمكىندىگى - 6,5-84 پايىز ارالىعىندا. ال ولاردىڭ دامۋ دەڭگەيى مەن پروبلەمالارىنىڭ اۋقىمى دا ءارتۇرلى. بۇل رەتتە سالىق سالىناتىن بازانى كەڭەيتۋگە ءىس جۇزىندە ىنتالاندىرۋ جوق. قولدانىستاعى بيۋدجەتارالىق قاتىناستار جۇيەسىنىڭ جەتىلمەگەنى كورىنىپ تۇر. بۇنىڭ بارلىعى الەۋمەتتىك جىكتەلۋ مەن ىشكى كوشى- قوننىڭ قۇبىلۋىن كۇشەيتىپ، دامۋشى قالالاردىڭ ينفراقۇرىلىمىنا ايتارلىقتاي اۋىرتپالىق تۇسىرەدى»، - دەدى ناتاليا گودۋنوۆا.

ونىڭ اتاپ وتۋىنشە، ورتالىق مەملەكەتتىك ورگاندار وڭىرلەردەگى جەتەكشىلىك ەتەتىن باعىتتاردى جەتكىلىكتى دەڭگەيدە ۇيلەستىرمەيدى.

جوسپارلاۋ جانە ورىنداۋ جەرگىلىكتى اتقارۋشى ورگاندارعا بەرىلگەن.

«مينيسترلىكتەردىڭ جاۋاپكەرشىلىكتى وڭىرلەرگە ىسىرا سالۋعا دەگەن ۇمتىلىسى انىق كورىنەدى. تەك بيىلدىڭ وزىندە 2 تريلليون تەڭگەدەن استام قاراجات جالپى سيپاتتاعى ترانسفەرت بازاسىنا بەرىلدى. ال 2022 -جىلى ولاردىڭ ورىندالۋى كوپ سۇراق تۋعىزدى. ەندى ولار جوعارى اۋديتورلىق پالاتانىڭ باقىلاۋىنان مۇلدەم تىس قالدى. بۇل رەتتە تاياۋداعى ءۇش جىلدا سۋبۆەنتسيا كولەمى 3 ەسە وسپەك»، - دەدى پالاتا ءتوراعاسى.


سوڭعى جاڭالىقتار