14:27, 05 - ماۋسىم 2023 | GMT +6
كاتونقاراعاي، ۇلكەن نارىن، كۇرشىم، مارقاكولدىڭ مارتەبەسىن قالپىنا كەلتىرۋ ءىسى قولعا الىنادى - مينيسترلىك
استانا. قازاقپارات - كوپشىلىك تالقىعا شىعارعان اۋىلدىق اۋماقتارىن دامىتۋدىڭ 2023-2027 -جىلدارعا ارنالعان تۇجىرىمداماسىندا شەكارا ماڭىنداعى اۋدانداردىڭ اكىمشىلىك- اۋماقتىق ماڭىزدىلىعىن ارتتىرۋعا باسىمدىق بەرىلەتىنى جازىلعان، دەپ حابارلايدى قازاقپارات ءتىلشىسى.
«تۇجىرىمداماعا ساي، وتكىزۋ پۋنكتتەرىنىڭ ينفراقۇرىلىمىن دامىتۋ جانە جايلاستىرۋ جونىندە شارالار قابىلداناتىن بولادى. شەكارا ماڭىنداعى اۋدانداردىڭ اكىمشىلىك- اۋماقتىق ماڭىزدىلىعىن ارتتىرۋعا ەرەكشە نازار اۋدارىلادى. بۇل نەگىزىنەن قىتايمەن شەكتەسەتىن بۇرىنعى اۋىلدىق اۋماقتار - كاتونقاراعاي، ۇلكەن نارىن، كۇرشىم، مارقاكول، ماقانشىنىڭ مارتەبەسىن قالپىنا كەلتىرۋ ماسەلەلەرىنە قاتىستى بولادى»، - دەلىنگەن اشىق ن ق ا پورتالىندا جاريالانعان قۇجاتتا.
سونىمەن بىرگە تۇجىرىمداما جوباسىندا قىتايمەن شەكارالاس اۋداندارداعى حالىقتىڭ تىعىزدىعى ەل بويىنشا ورتاشا دەڭگەيدەن تومەن ەكەندىگى جازىلعان.
بۇعان قوسا، ەلىمىزدىڭ 7 شەكارالاس وڭىرىندەگى اۋىلداردىڭ حالىق سانى ازايىپ بارا جاتىر.
اۆتور:
ءاليحان اسقار