ءماجىلىس دەپۋتاتى وتاندىق ونىمدەردەن عانا ءۇي سالاتىن يپوتەكالىق باعدارلاما اشۋدى ۇسىندى
«ۇكىمەتكە ءتۇرلى سالالار بويىنشا حالىق تابىسىنىڭ ارتۋىنا تىكەلەي اسەر ەتە الاتىن وزگە دە قوسىمشا كەشەندى ماسەلەلەردى قاراستىرۋدى ۇسىنامىز. ءبىرىنشى ەڭ ءىرى سالا - ەكونوميكانى دامىتۋدىڭ درايۆەرى سانالاتىن تۇرعىن ءۇي قۇرىلىسى. بۇل جەردە بىزگە قۇرىلىس كومپانيالارىنان تەك قازاقستاندىق ماتەريالدى عانا پايدالانۋدى تالاپ ەتەتىن جاڭا يپوتەكالىق باعدارلاما كەرەك. ونىڭ ەكونوميكاعا تيگىزەتىن اسەرىن وزدەرىڭىز جاقسى بىلەسىزدەر»، - دەدى ول.
دەپۋتات اۋىل شارۋشاىلىعىن كانادانىڭ تاسىلىمەن دامىتۋعا بولاتىنىن ايتادى.
«ەكىنشىسى - اگروونەركاسىپ كەشەنىن دامىتۋ. وزگە ەلدەردىڭ تابىستى تاجىريبەسىن زەردەلەۋ كەرەك. مىسالى، كانادا تاجىريبەسى بار. ول ەلدە مەملەكەتتىك اۋىلشارۋاشىلىق كاسىپورىن تاپسىرىس بەرۋشى رەتىندە دە، ساتىپ الۋشى رەتىندە دە قاتىسادى. مۇنداي جۇيەدە مەملەكەتتىك ساتىپ الۋ بەكىتىلگەن باعا بويىنشا جۇرگىزىلەدى. اۋىلشارۋاشىلىق ءونىم ساتىلعاننان كەيىن تابىستىڭ 80 پايىزىنا دەيىن وندىرۋشىلەرگە قايتارىلادى»، - دەدى ءمادي تاكيەۆ.
سونداي-اق، ول ترانزيتتىك تاسىمالدى دامىتۋ ارقىلى مىڭداعان جۇمىس ورىندارىن قۇرۋعا بولاتىنىن ەسكە سالدى.
«ءۇشىنشىسى - كولىك الەۋەتىن دامىتۋ. بۇگىندە ءبىزدىڭ ەلدىڭ ترانزيت الەۋەتى جوعارى ەكەنىن ءتۇسىنىپ وتىرمىز. قازاقستان حالىقارالىق اۆتوموبيل تاسىمالداۋشىلار وداعى جالپى پاركى 7 مىڭ جۇك كولىگىنە جەتكەن 350 دەي كومپانيا بار ەكەنىن ايتىپ وتىر. ءبىز بۇل سالادا ۇلكەن لوگيستيكالىق حابقا اينالا الار ەدىك. سونىڭ ارقاسىندا مىڭداعان جۇمىس ورنى اشىلادى»، - دەدى ءماجىلىس دەپۋتاتى.
