قازاقستاندا انالار جانە اكەلەر كۇنى دەگەن قوس مەرەكە پايدا بولدى

استانا. قازاقپارات - ەندى ەلىمىزدە ەكى مەيرام - انالار جانە اكەلەر كۇنى مەرەكەسى بولەك-بولەك اتالىپ وتەدى.

پرەمەر-مينيستر ءاليحان سمايىلوۆ ءتيىستى قاۋلىعا قول قويدى، دەپ حابارلايدى قازاقپارات ءتىلشىسى.

قۇجاتتا كورسەتىلگەندەي، انالار كۇنى - مامىردىڭ ەكىنشى جەكسەنبىسىندە، ال اكەلەر كۇنى ماۋسىمنىڭ ءۇشىنشى جەكسەنبىسىندە مەرەكەلەنەدى.

اقپارات جانە قوعامدىق دامۋ مينيسترلىگىنىڭ مالىمەتىنشە، اتالعان مەرەكەلىك كۇندەردى بەكىتۋ ەلىمىزدەگى وتباسى ينستيتۋتىن نىعايتۋعا ىقپال ەتپەك.

«مەرەكەلىك كۇندەردىڭ تىزبەسىنە «انالار كۇنى» جانە «اكەلەر كۇنى» مەرەكەلەرىن ەنگىزۋ قازاقستانداعى وتباسىلىق قۇندىلىقتاردى ىلگەرىلەتۋگە، وتباسى ينستيتۋتىن نىعايتۋعا، سونداي-اق اكەلەر ينستيتۋتىن دامىتۋعا ىقپال ەتەدى. مۇنداي مەرەكە كوپتەگەن الەم ەلدەرىندە بار»، - دەلىنگەن مينيسترلىكتىڭ Telegram ارناسىندا جاريالانعان حابارلامادا.