بيىلدان باستاپ قانداي انالارعا ءومىر بويىنا جاردەماقى تاعايىندالاتىنى بەلگىلى بولدى
«1- شىلدەدەن باستاپ الەۋمەتتىك كودەكس اياسىندا «ماراپاتتالعان انالار» تۋرالى جاڭا ۇعىم ەنگىزىلىپ وتىر. بۇل مارتەبە كوپبالالى انالاردىڭ ەڭبەگىن قۇرمەتتەۋ جانە مويىنداۋ رەتىندە ءومىر بويىنا «التىن القا»، «كۇمىس القا»، «باتىر انا»، I جانە Ⅱ دارەجەلى «انا داڭقى» وردەندەرىمەن ناگرادتالعان ايەلدەرگە بەرىلەدى. بالا تاربيەلەپ، ءوسىرىپ وتىرعان انالارعا تولەنەتىن جاردەماقى 1- شىلدەدەن باستاپ 7,4 ايلىق ەسەپتىك كورسەتكىشكە تەڭ نەمەسە 25530 تەڭگە بولادى»، - دەدى ول.
ايتا كەتەيىك، 1- شىلدەدەن باستاپ اۋتيزم دياگنوزى بار بالالارعا شيپاجايدا ساۋىقتىرۋ قىزمەتى تەگىن ۇسىنىلماق.
سونداي-اق 1- شىلدەدەن باستاپ ەكى بىردەي الەۋمەتتىك جاردەماقىنىڭ كولەمى 14,5 پايىز وسەدى.
«الەۋمەتتىك كودەكس اياسىندا 1- شىلدەدەن باستاپ مۇگەدەكتىك بويىنشا، اسىراۋشىسىنان ايىرىلۋ سەبەبىمەن تولەنەتىن الەۋمەتتىك جاردەماقىلاردىڭ كولەمى ۇلعايادى. ونىڭ مولشەرى ورتا ەسەپپەن 14,5 پايىزعا ارتادى. وسى ماقساتقا رەسپۋبليكالىق بيۋجەتتەن قوسىمشا 41 ميلليارد تەڭگە ءبولىندى»، - دەدى ۆيتسە-مينيستر نازگۇل ساعىندىقوۆا.