الماتىدا «اڭساعان ءسابي» ءمۇسىنى ورناتىلدى

None
الماتى. قازاقپارات - الماتىدا «اڭساعان ءسابي» ءمۇسىنى اشىلدى. ءمۇسىن قازاقستان حالقىنىڭ رەپرودۋكتيۆتى دەنساۋلىعىن جاقسارتۋعا باعىتتالعان پرەزيدەنتتىك باعدارلامانىڭ قۇرمەتىنە تۇرعىزىلدى.

سونداي-اق، New Generation Clinic (NGC) زاماناۋي حالىقارالىق رەپرودۋكتسيا ورتالىعى اشىلدى، دەپ حابارلايدى قازاقپارات ءتىلشىسى.

2020-جىلى پرەزيدەنت قاسىم-جومارت توقايەۆ «اڭساعان ءسابي» ۇلتتىق جوباسىن جاريالاعان بولاتىن. بۇل باعدارلاما بويىنشا بەدەۋلىكتى ەكستراكورپورالدى ۇرىقتاندىرۋ (ە ق ۇ) ادىسىمەن ەمدەۋگە جىل سايىن 7 مىڭ كۆوتا بولىنەدى، سول ارقىلى 2021-جىلى ەلىمىزدە 3 مىڭ بالا ومىرگە كەلدى. بۇل تۋرالى بيولوگيا عىلىمدارىنىڭ دوكتورى، پروفەسسور، «ەكومەد» ادام ۇرپاعىن ءوربىتۋ كلينيكالار توبىنىڭ عىلىمي جەتەكشىسى، ق ر ۇلتتىق عىلىم اكادەمياسىنىڭ قۇرمەتتى سالتانات بايقوشقاروۆا ايتتى.

photo

«قازاقستانداعى ءاربىر التىنشى ەرلى-زايىپتى بەدەۋلىككە شالدىققان. كورسەتكىشتەرى ءوسىپ كەلە جاتقان رەسمي ستاتيستيكاعا سايكەس ەلىمىزدە 21 مىڭنان استام ادامعا بەدەۋلىك دياگنوزى قويىلعان. بار كۇش-قۋاتىم مەن قابىلەتىمدى بەدەۋلىككە قارسى كۇرەسكە ارناعان رەپرودۋكتيۆتى مەديتسينا سالاسىنىڭ مامانى رەتىندە مەن ءۇشىن بۇل ءمۇسىن جاي عانا سيمۆول ەمەس. ءبىزدىڭ ماقساتىمىز - رەپرودۋكتيۆتى مەديتسينا سالاسىنداعى زەرتتەۋلەردى، يننوۆاتسيالاردى قولداۋ مەن دامىتۋدىڭ ماڭىزدىلىعىنا قوعامنىڭ نازارىن اۋدارۋ. سونىمەن قاتار، بەدەۋلىك ماسەلەسىنە تاپ بولعان ەرلى-زايىپتىلارعا ەموتسيونالدىق كومەك پەن جاناشىرلىق تانىتۋ دا ماڭىزدى»، - دەدى اشىلۋ سالتاناتىندا سالتانات بايقوشقاروۆا.

photo

جاڭا قولا ءمۇسىن New Generation Clinic (NGC) حالىقارالىق رەپرودۋكتسيا ورتالىعى عيماراتىنىڭ قاسبەتىنە ورناتىلدى.

«جاڭا ءمۇسىن رەپرودۋكتيۆتى مەديتسينا سالاسىنداعى قاجىرلى ەڭبەك پەن جەتىستىكتەردى بەينەلەيدى. انانىڭ الاقانىنداعى ءسابيدىڭ بەينەسىندەگى كومپوزيتسيا - رەپرودۋكتيۆتى دەنساۋلىق سالاسىنداعى عىلىمي جاڭالىقتار مەن يننوۆاتسيالاردىڭ ماڭىزدىلىعىن بىلدىرەدى. ءمۇسىن - انا بولۋدى ارماندايتىن ءاربىر ايەلدىڭ قۋاتى مەن نازىكتىلىگىنىڭ، سەنىمى مەن باتىلدىعىنىڭ سيمۆولى»، - دەدى سالتانات بايقوشقاروۆا.

photo

ول سونداي-اق New Generation Clinic (NGC) كلينيكاسىن اشۋ تۋرالى ويىمەن ءبولىستى.

photo

«قازىرگى تاڭدا رەپرودۋكتيۆتى تەحنولوگيالار ۇزدىكسىز دامىپ كەلەدى. مەن «ەكومەد» كلينيكالار توبىنىڭ قازاقستان مەن ورتالىق ازياداعى ەكستراكورپورالدى ۇرىقتاندىرۋ سالاسىنداعى كوشباسشىعا اينالعانىن ماقتان تۇتامىن. ءاۋ باستان-اق قازاقستاندىق رەپرودۋكتيۆتى مەديتسيناعا سوڭعى جاڭالىقتار مەن تەحنولوگيالاردى ەنگىزۋدى ماقسات ەتكەنمىن. وسىلايشا، New Generation Clinic (NGC) زاماناۋي حالىقارالىق رەپرودۋكتسيا ورتالىعىن ىسكە قوسۋ يدەياسى دۇنيەگە كەلدى. بۇل الەمدىك ستاندارتتارعا سايكەس جۇمىس ىستەيتىن، ەڭ جوعارى ساناتتاعى قىزمەت پەن ەمدەۋدى ۇسىناتىن وزىق جاڭا بۋىن كلينيكاسى. مۇندا قازاقستاندا العاش رەت جاساندى ينتەللەكت ارقىلى بەدەۋلىكتى ەمدەۋدىڭ ەڭ زاماناۋي ادىستەرى قولدانىلۋدا»، - دەدى دارىگەر.

photo

«اڭساعان ءسابي» ءمۇسىنىن «ارت اليانس» شىعارماشىلىق توبىنىڭ مۇسىنشىلەرى جاساپ شىقتى.

photo

«بۇل ءمۇسىندى جاساۋعا ەكى ايعا جۋىق ۋاقىت كەتتى. ءبىز بىرنەشە ەسكيز جاساعان ەدىك. ولاردىڭ ىشىنەن وسى «اڭساعان ءسابي» ەسكيزىنە توقتادىق. ءمۇسىننىڭ بيىكتىگى 2,5 مەتر، قولادان جاسالعان. بۇدان بولەك، «ءۇمىت» دەگەن ءمۇسىن جاساپ، ونى كلينيكانىڭ ىشىنە ورناتتىق. ايتا كەتەيىك، ءبىز بۇل مۇسىندەردەن بولەك، الماتىداعى اشارشىلىق قۇرباندارىنا ارنالعان، ىبىراي التىنسارين ءمۇسىنىن، تارازدا دىنمۇحامەت قونايەۆتىڭ، اساتانادا ءال-فارابيگە ءمۇسىن جاساعان بولاتىنبىز»، - دەدى «ارت اليانس» شىعارماشىلىق توبىنىڭ ءمۇسىنشىسى دۋلات ۇسەنبايەۆ.

photo

photo