قازاقستان شەكاراسى ارقىلى وتەتىن جۇك كولىكتەرىنەن الىناتىن تولەم مولشەرى بەكتىلدى

استانا. قازاقپارات – ق ر قارجى ءمينيسترى ەرۇلان جاماۋبايەۆ «ق ر مەملەكەتتىك شەكاراسى ارقىلى اۆتوموبيل كولىك قۇرالدارىن، جۇكتەر مەن تاۋارلاردى وتكىزۋ، سونداي- اق ولاردى ەلەكتروندىق كەزەك بويىنشا ءوتۋى ءۇشىن تولەماقى مولشەرلەرىن ايقىنداۋ تۋرالى» بۇيىرىعىنا قول قويدى.

ول كەلەر جىلدىڭ 1- قاڭتارىنان كۇشىنە ەنەدى، دەپ حابارلايدى قازاقپارات ءتىلشىسى.

«قوسا بەرىلىپ وتىرعان ق ر مەملەكەتتىك شەكاراسى ارقىلى اۆتوموبيل كولىك قۇرالدارىن، جۇكتەر مەن تاۋارلاردى وتكىزۋ ءۇشىن تولەماقى مولشەرى بەكىتىلسىن. وسى بۇيرىق 2024 -جىلعى 1 -قاڭتاردان باستاپ قولدانىسقا ەنگىزىلەدى جانە رەسمي جاريالانۋعا ءتيىس»، - دەلىنگەن ەرۇلان جاماۋبايەۆ قول قويعان بۇيرىقتا.

قۇجاتتىڭ قوسىمشاسىندا كورسەتىلگەندەي، ەندى ەلەكتروندىق كەزەك بويىنشا ءوتۋ كەزىندە مىنا مولشەردەگى تولەمدەر الىنادى:

- جۇك، ونىڭ ىشىندە تىركەمەلەرى بار اۆتوموبيلدەردى، ەرشىكتى تارتقىشتاردى ەلەكتروندىق كەزەكتىڭ اۆتوماتتاندىرىلعان جۇيەسىندە برونداۋ كۇنى مەن ۋاقىتىنا سايكەس قازاقستان رەسپۋبليكاسىنىڭ مەملەكەتتىك شەكاراسى ارقىلى وتكىزۋ ءۇشىن - 1 ا ە ك (3450 تەڭگە)؛

- جۇك، ونىڭ ىشىندە تىركەمەلەرى بار اۆتوموبيلدەردى، ەرشىكتى تارتقىشتاردى كەزەكتەن تىس (جەدەلدەتىلگەن) تارتىپپەن كورسەتىلگەن ۋاقىت كەزەڭىندە شەكارا ارقىلى ءوتۋ كۇنىن اۋىستىرۋ مۇمكىندىگىمەن تولەم جاسالعان كۇننەن باستاپ - كۇنتىزبەلىك 30 كۇن ىشىندە بىرنەشە رەت ق ر مەملەكەتتىك شەكاراسى ارقىلى وتكىزۋ ءۇشىن - 100 ا ە ك (345000 تەڭگە)؛

- جۇك، ونىڭ ىشىندە تىركەمەلەرى بار اۆتوموبيلدەردى، ەرشىكتى تارتقىشتاردى كەزەكتەن تىس (جەدەلدەتىلگەن) تارتىپپەن كورسەتىلگەن ۋاقىت كەزەڭىندە شەكارا ارقىلى ءوتۋ كۇنىن اۋىستىرۋ مۇمكىندىگىمەن تولەم جاسالعان كۇننەن باستاپ - كۇنتىزبەلىك 5 كۇن ىشىندە بىرنەشە رەت ق ر مەملەكەتتىك شەكاراسى ارقىلى وتكىزۋ ءۇشىن - 50 ا ە ك (172500 تەڭگە) .

قوسا كەتسەك، كەلەر جىلدىڭ باسىنان قازاقستاندىق جۇك تاسىمالداۋشىلارعا شەت مەملەكەتتەردىڭ اۋماعى ارقىلى ءوتۋ ءۇشىن بەرىلەتىن رۇقسات ەلەكتروندى فورماتتا ۇسىنىلادى.