عاسىرلىق تاريحى بار ياۆلەنكا ستانساسى دۇنيەجۇزىلىك مەتەورولوگيا ۇيىمىنىڭ تىزىمىنە ەندى
«قازگيدرومەت» ر م ك س ق و فيليالىنىڭ مالىمەتىنشە، كوپجىلدىق مەتەورولوگيالىق باقىلاۋلار - قازىرگى جانە بولاشاق ۇرپاقتاردىڭ ۇزاقمەرزىمدى، جوعارى ساپالى كليماتتىق جازبالارداعى قاجەتتىلىكتەرىنە قىزمەت ەتەتىن ادامزاتتىڭ تاپتىرماس مادەني جانە عىلىمي مۇراسىنىڭ ءبىر بولىگى.
بىلتىر «قازگيدرومەت» ر م ك ءوزىنىڭ عاسىرلىق مەرەيتويىن اتاپ ءوتتى، ءبىراق ەلىمىزدىڭ اۋماعىندا اۋا رايىن ۇزدىكسىز جانە ساپالى باقىلاۋ الدەقايدا ەرتە باستالعان.
2017 جانە 2020 -جىلدار ارالىعىندا دۇنيەجۇزىلىك مەتەورولوگيالىق ۇيىمنىڭ اتقارۋشى كەڭەسى عاسىرلىق تاريحى بار باقىلاۋ ستانسيالارىنىڭ دۇنيەجۇزىلىك تىزىمىنە قازاقستاننىڭ 14 مەتەوستانساسىن ەنگىزدى، ولار - «اقكول»، «ارال تەڭىزى»، «اتباسار»، «ىرگىز»، «قازالى»، «ميحايلوۆكا»، «تۇركىستان»، «فورت- شيەۆچەنكو»، «مەركە»، «كوكشەتاۋ»، «اقتوبە»، «تورعاي»، «سەمياركا» جانە «جاركەنت» .
ءبىراق قازاقستاندا 100 جىلدان استام ۋاقىت جۇمىس ىستەپ كەلە جاتقان 35 شاقتى مەتەورولوگيالىق ستانسا بار.
«2023 -جىلدىڭ مامىر ايىندا دۇنيەجۇزىلىك مەتەورولوگيالىق ۇيىم بۇل تىزىمگە قازاقستاننىڭ تاعى 7 مەتەوستانساسىن جانە گيدروپوستىن ەنگىزدى، ولار - «ت. رىسقۇلوۆ اۋىلى»، «ەسىك»، «پاۆلودار»، «تاراز»، «ياۆلەنكا»، «فورت- شيەۆچەنكو» جانە «كوشىم» گيدروپوستى. قازاقستاننىڭ بارلىق مەتەوستانسالارى كەزەڭ- كەزەڭىمەن قوسىلادى»، - دەيدى وبلىستىق فيليالدىڭ ديرەكتورى قىمبات مەرعاليموۆا.
تىزىمگە بيىل قوسىلعان «ياۆلەنكا» مەتەوستانساسى 1902 -جىلى اشىلعان. ول س ق و ەسىل اۋدانى پوكروۆكا اۋىلىندا ورنالاسقان.
«1933 -جىلعا دەيىن مەتەوستانسا «پەتروپاۆل اۋىلشارۋاشىلىق تەحنيكۋمى» دەپ اتالدى، ال 1933 -جىلدان باستاپ اتاۋى «ياۆلەنكا» دەپ وزگەرتىلدى. ستانساداعى فەنولوگيالىق باقىلاۋلار 1937 -جىلدان باستاپ جۇرگىزىلە باستادى، ال 1938 -جىلى توپىراق ىلعالدىلىعىن اسپاپتىق ولشەۋ باستالدى»، - دەيدى قىمباي مەرعاليموۆا.
بۇگىنگى تاڭدا مەتەورولوگيالىق الاڭ پوكروۆكا اۋىلىنىڭ وڭتۇستىك- باتىس شەتىندە ورنالاسقان. ستانتسيادا بۇگىندە 5 ادام ەڭبەك ەتەدى.