باتىس قازاقستاندا «بەسەۋدىڭ حاتى» ەسكەرتكىش تاقتاسى ورناتىلدى

ورال. قازاقپارات - ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي كازتالوۆ اۋدانى ورتالىعى كازتالوۆ اۋىلىندا «بەسەۋدىڭ حاتى» ەسكەرتكىش تاقتاسى اشىلدى، دەپ حابارلايدى قازاقپارات ءتىلشىسى.

ەسكەرتكىش تاقتانىڭ اشىلۋ راسىمىنە قاتىسقان اۋدان اكىمى اسلانبەك سارقۇلوۆتىڭ ءمالىم ەتكەنىندەي، 2020-جىلى مەملەكەت باسشىسى قاسىم-جومارت توقايەۆتىڭ ساياسي قۋعىن-سۇرگىن قۇرباندارىن تولىق اقتاۋ جونىندە تاپسىرماسىنا سايكەس وڭىرلىك كوميسسيالار قۇرىلعان.

«وڭىرلىك كوميسسيا جۇمىسىنا كازتالوۆ اۋدانىنىڭ ازاماتتارى دا ءوز ۇلەستەرىن قوستى. بۇل باعىتتا ارنايى جيناقتار باسىلىپ شىقتى. وسى ارقىلى تاريحتىڭ جاڭا ءبىر تىنىسى اشىلىپ، وشكەنىمىز جانىپ، ولگەنىمىز تىرىلگەندەي بولدى. ساياسي قۋعىن-سۇرگىن مەن اشارشىلىق تاقىرىبىن قوزعاعان كەزدە «بەسەۋدىڭ حاتى» ويعا ورالارى انىق. حاتتا كازتالوۆ اۋدانىنان تۇلەپ ۇشقان مەملەكەت جانە قوعام قايراتكەرى مانسۇر ءعاتاۋليننىڭ دە قولتاڭباسى بولۋى - ءبىز ءۇشىن ماقتانىش. بۇگىن، مىنە، ولكە تاريحىن تۇگەندەپ، ارىستارىن جوقتاعان سەرىك جۇماعالييەۆ، ءۋاليوللا ابىشيەۆ سىندى ازاماتتارىمىزدىڭ باستاماسىمەن، حالىقتىڭ قولداۋىمەن «بەسەۋدىڭ حاتى» ەسكەرتكىش تاقتاسى اشىلىپ وتىر. اتالعان ازاماتتارعا، قولداۋ كورسەتكەن جانداردىڭ بارىنە شىنايى ريزاشىلىعىمدى بىلدىرەمىن»، - دەدى ا. سارقۇلوۆ.

اۋدان ورتالىعىنداعى «جەڭىس» ساياباعىندا بوي كوتەرگەن ەسكەرتكىشتىڭ اشىلۋ بارىسىندا س. سادىقوۆ اتىنداعى اۋداندىق مادەني-دەمالىس ورتالىعى جانىنداعى حالىقتىق تەاترى «بەسەۋدىڭ حاتى» قويىلىمى ارقىلى حات اۆتورلارى عابيت مۇسىرەپوۆ، ەمبەرگەن التىنبەكوۆ، مانسۇر عاتاۋلين، مۇتاش داۋلەتقاليەۆ، قادىر قۋانىشيەۆتىڭ ەرلىگىن كوپشىلىك نازارىنا ۇسىندى.

ەڭبەك ارداگەرى ءۋاليوللا ابىشيەۆتىڭ ايتۋىنشا، «بەسەۋدىڭ حاتى» اشارشىلىققا بايلانىستى جازىلعانى ءمالىم.

ونى قازاقستان حالىق جازۋشىسى شەرحان مۇرتازا تاريحي دراماسىنا ارقاۋ ەتتى.

سونداي-اق كازتالوۆتىق قالامگەر، قازاقستاننىڭ قۇرمەتتى ءجۋرناليسى سەرىك جۇماعاليەۆ ارنايى ماقالا جازدى.

ەسكەرتكىش تاقتا اكادەميك، سۋرەتشى ماقسۇت يسماعۇلوۆتىڭ جوباسى بويىنشا جاسالدى. بۇل كلاسسيكالىق تۇرعىدان قاراعاندا، اق پەن قارانىڭ ۇيلەسىمدىلىگىن بايقاتادى.

ال حات اۆتورلارىنىڭ ەسىمى جازىلعان تاقتا ءبىر جاعى جەردە، ءبىر جاعى كوككە ۇمتىلعان قۇستىڭ قاناتى ىسپەتتەس.

دالىرەك ايتقاندا، زوبالاڭ جىلداردى باسىنان وتكەرىپ، جارقىن بولاشاققا ۇمتىلعان حالىقتىڭ ارمانى دەسە بولادى.

ەسكە سالا كەتەيىك، بۇدان بۇرىن ب ق و- دا ساياسي قۋعىن-سۇرگىن قۇرباندارىن اقتاۋ جايلى جاڭا كىتاپتار تانىستىرىلعانىن جازعان بولاتىنبىز.