وڭتۇستىكتەن سولتۇستىككە: تۇركىستان وبلىسى تۇرعىندارى تەرىسكەيدەگى تىرشىلىكتى كورۋ ءۇشىن جولعا شىقتى

None
تۇركىستان. قازاقپارات - وڭتۇستىك ءوڭىر تۇرعىندارى سولتۇستىكتەگى تىرشىلىكتى كورۋ ءۇشىن جولعا شىقتى، دەپ حابارلايدى قازاقپارات ءتىلشىسى.

تەرىسكەيگە اتتانعان توپتىڭ قاتارىندا باق وكىلدەرى دە بار. ولار 13 اۋداندى ارالاپ، كوپشىلىكتى جەرگىلىكتى حالىقتىڭ تىنىس-تىرشىلىگىمەن تانىستىرادى.

photo

كوش قاتىسۋشىلارىن «AMANAT» پارتياسى تۇركىستان وبلىستىق فيليالىنىڭ ءتوراعاسى التىنسارى ۇمبەتاليەۆ، «Tauekel» ۇيىمىنىڭ ءتوراعاسى بۋراحان داقانوۆ جانە ءبىرقاتار وبلىستىق ءماسليحات دەپۋتاتتارى سالتاناتتى تۇردە شىعارىپ سالدى.

photo

«جالپى، تەرىسكەيگە باراتىن تۇركىستاندىقتاردى جارلى، كومەك قاجەت ەتەتىن ادامدار دەگەن ستەرەوتيپتەن ارىلۋىمىز كەرەك. بۇل ءوڭىر تۇرعىندارى - كومەك الۋشى ەمەس، قازاقتى قۇتقارۋشى ازاماتتار. سولتۇستىككە كوش - ەلىمىزدىڭ بەكەمدىگى ءۇشىن وتە قاجەت شارا. ەلىمىزدەگى 3,2 ميلليونعا جۋىق وقۋشىنىڭ 530 مىڭى تۇركىستان وبلىسىندا ەكەن. سولتۇستىكتەگى اۋىلداردا جابىلايىن دەپ تۇرعان مەكەمەلەردى امان الىپ قالاتىن وسى ايماقتىڭ ازاماتتارى دەر ەدىم. سوندىقتان دا ەلىم-جەرىم دەگەن ءوڭىر تۇرعىندارى ەل ىرگەسىن بەكەمدەۋ ءۇشىن تەرىسكەيگە كوشىپ بارۋى كەرەك»، — دەيدى «Tauekel» ۇيىمىنىڭ ءتوراعاسى بۋراحان داقانوۆ.

«قۋاتتى وڭىرلەر - ەل دامۋىنىڭ درايۆەرى» جوباسى اياسىندا 2015-جىلدان بەرى تۇركىستان وبلىسىنان جۇمىس كۇشى جەتىسپەيتىن سولتۇستىك وڭىرلەرگە حالىقتى قونىستاندىرۋ جۇمىسى جۇرگىزىلىپ جاتىر.

photo

اتالعان باعدارلاما بويىنشا 2015-2022-جىلدار ارالىعىندا وڭتۇستىكتەن سولتۇستىككە 11892 ادام قونىس اۋدارعان.

2022-جىلدىڭ قورىتىندىسىمەن رەسپۋبليكا بويىنشا 6587 كۆوتا بەلگىلەنسە، ونىڭ %32,3 تۇركىستان وبلىسىنىڭ تۇرعىندارىنا بەرىلدى.

بۇل كورسەتكىش الدىڭعى جىلدارمەن سالىستىرعاندا 3 ەسە كوپ.

ال، بيىل جىل باسىنان بەرى تۇركىستان وبلىسىنان 34 وتباسى، ونىڭ ىشىندە 79 ادام سولتۇستىككە قونىس اۋدارعان.