دەمىكپە قانداي دەرت

استانا. قازاقپارات - دەمىكپە تىنىس الۋ جولدارىنىڭ بۇزىلۋىنان پايدا بولاتىن سىرقات. وعان بەيجاي قاراۋعا بولمايدى. اتالعان اۋرۋدىڭ بەلگىلەرىنە زەرتتەۋ جۇرگىزىپ كوردىك.

ادامدا فيزيكالىق بەلسەندىلىك جوعارى بولعان كەزدە تىنىس الۋدىڭ قيىنداۋى قالىپتى سانالادى. ويتكەنى مۇنداي جاعداي ساۋ ادامدا دا بولۋى مۇمكىن. مىسالى، باسپالداقپەن ۇزاق كوتەرىلگەن كەزدە. الايدا اۋرۋدىڭ بەلگىلەرىنە دە ءمان بەرگەن ءجون. اسىرەسە تۇنگى ۇيقى كەزىندە تىنىشتىعىڭىز بۇزىلسا، بۇرىن وڭاي اتقاراتىن ءىستى قينالىپ ىستەسەڭىز، دەنە تەمپەراتۋراسى جوعارىلاپ، جوتەلسەڭىز، دارىگەرگە قارالعانىڭىز ءجون.

دەمىكپە نەدەن پايدا بولادى؟

دەمىكپەمەن كەز كەلگەن ادام اۋىرۋى مۇمكىن. ءبىراق بۇل سىرقات جاستار اراسىندا (40 جاسقا دەيىن) كەڭ تارالعان. كوبىنە اللەرگياسى بار جانە تەمەكى شەگەتىن ادامداردا ءجيى كەزدەسەدى. جالپى دەمىكپە كەز كەلگەن ادامدا، كەز كەلگەن ۋاقىتتا پايدا بولۋى مۇمكىن.

اۋرۋدىڭ تۇرلەرى

ينسپيراتورلىق - تىنىس الۋدىڭ قيىنداعانىنان بىلىنەدى جانە وكپە پاتولوگياسىندا، اتاپ ايتقاندا فيبروزدا (الۆەوليت، ساركويدوز، بەريلليوز)، كارتسينوماتوزدا، كلاپان پنيەۆموتوراكسىندا، ديافراگما السىرەگەندە پايدا بولادى.

ەكسپيراتورلىق - دەم شىعارۋدىڭ قيىنداۋىنان بىلىنەدى. نەگىزىنەن برونح دەمىكپەسىندە جانە سوزىلمالى وبسترۋكتيۆتى برونحيتتە داميدى.

ارالاس - ينگالياتسيا دا، دەم شىعارۋ دا قيىندايدى (اۋىر پنيەۆمونيا كەزىندە بولۋى مۇمكىن) .

وتتەگىنىڭ جەتىسپەۋشىلىگىنەن قالىپتى تىنىس الۋدىڭ بۇزىلۋىنان دەنەنىڭ بارلىق جۇيەسى زارداپ شەگەدى.

بەلگىلەرى

دەمىكپەمەن اۋىراتىنداردىڭ بارلىعىندا بىردەي بەلگىلەر بولمايدى، دەگەنمەن نەگىزگىلەرى:

جوتەل

كەۋدە قۋىسىنىڭ قىسىلۋى

كەۋدە اۋىرۋى

ەنتىگۋ

داۋىستا سىرىل پايدا بولۋ

قالاي قۇتىلۋعا بولادى؟

ەگەر تىنىس الۋ جيىلىگىنىڭ وزگەرۋى كەنەتتەن پايدا بولسا، دەرەۋ دارىگەر شاقىرۋ قاجەت. ال ول كومەك كەلگەنشە نە ىستەۋگە بولادى؟

- ەگەر بولمە قاپىرىق بولسا، تەرەزەنى اشىپ، بولمەنى جەلدەتىڭىز؛

- قىسىم مەن تامىر سوعىسىن ولشەڭىز؛

- دارىگەر ۇسىنباعان ءدارى- دارمەكتەردى تەكسەرۋدەن بۇرىن ءوز بەتىڭىزشە قابىلداماڭىز؛

- قويۋ شاي، كوفە، الكوگول، نيكوتين (كەز كەلگەن ءتۇرى) قابىلداۋعا تىيىم سالىنادى.

ەنتىگۋ بىرتىندەپ كۇشەيىپ، سوزىلمالى تۇرگە اۋىسسا، دارىگەرگە بارعان دۇرىس. كەزدەسۋدە ءوزىڭىزدىڭ جاعدايىڭىزدى ەگجەي- تەگجەيلى سيپاتتاۋىڭىز كەرەك. جۇرەك سوعىسى، كەۋدەدەگى اۋىرسىنۋ، تۇسىنىكسىز مازاسىزدىق سەزىمى پايدا بولسا، جاسىرماي ايتىڭىز. سوسىن قاي كەزدە (سپورتپەن شۇعىلدانعاندا، باسپالداقپەن كوتەرىلگەندە جانە كۇيزەلىس كەزىندە) ۇستاما بولاتىنىن قاداعالاڭىز.