الماتىدا العاش رەت جۇرەكتىڭ وتكىزگىش جۇيەسىن ستيمۋلياتسيالاۋ وپەراتسياسى جاسالدى
ىنتالاندىرۋشى ەلەكترود جۇرەك ىرعاعىنىڭ فيزيولوگيالىق دەڭگەيدە بولۋىن قامتاماسىز ەتەدى. بىرەگەي وپەراتسيا بەس ناۋقاسقا جاسالدى، دەپ حابارلايدى قازاقپارات ءتىلشىسى.
دارىگەرلەردىڭ سوزىنشە، جۇرەكتىڭ وتكىزگىش جۇيەسىنە ىنتالاندىرۋشى ەلەكترودتاردى يمپلانتاتسيالاۋ پاتسيەنتكە جۇرەك جەتكىلىكسىزدىگىنىڭ دامۋىن بولدىرماۋعا مۇمكىندىك بەرەدى. وپەراتسيا كەزىندە تاۋەكەلدەر از، ويتكەنى جوعارى تەحنولوگيالىق جابدىق قولدانىلادى. ءار پاتسيەنت ءۇشىن شىعىن ماتەريالدارىنىڭ ۇلكەن سپەكترى جەكە تاڭدالادى.
«وتكىزگىش جۇيە بويىنشا ىنتالاندىرۋ قارىنشاارالىق ديسسينحرونيا ماسەلەلەرىن شەشۋگە، جۇرەكتىڭ ەكى قارىنشاسىن دا دالىرەك جانە سينحروندى تۇردە بەلسەندىرۋگە كومەكتەسەدى. بۇل پاتسيەنتتەردىڭ ءومىر ءسۇرۋ ساپاسىن جاقسارتادى. بۇل ءادىس ادەتتەگى وڭ قارىنشالىق ىنتالاندىرۋعا قاراعاندا الدەقايدا تيىمدىرەك»، - دەيدى كارديولوگيا جانە ىشكى اۋرۋلار عىلىمي- زەرتتەۋ ينستيتۋتى جۇرەك ىرعاعى مەن وتكىزگىشتىگىنىڭ بۇزىلۋى بولىمشەسىنىڭ مەڭگەرۋشىسى باعدات احىت.
بىرەگەي وپەراتسيا اريتمولوگيا سالاسى بويىنشا حالىقارالىق دەڭگەيدە مويىندالعان مامان پولشا مەديتسينالىق ۋنيۆەرسيتەتىنىڭ پروفەسسورى ياتسەك گاەكتىڭ قاتىسۋىمەن ءوتتى. ەل ايماقتارىنان كەلگەن ماماندار بىلىكتى دارىگەردىڭ ءدارىسىن تىڭداپ، تاجىريبەسىن كوزبەن كوردى.
«مەن قازاقستانعا وپەراتسياعا شاقىرتۋ العانىما وتە ريزامىن. بۇل - مەنىڭ ەكىنشى ساپارىم. بۇل ءادىس جۇرەك جەتكىلىكسىزدىگى بار ناۋقاستار ءۇشىن وتە ءتيىمدى. ارالاسۋدان كەيىن پاتسيەنت قوسىمشا ءدارى-دارمەك تەراپياسىن قاجەت ەتەتىن ىلەسپە پاتولوگيا بولماعان جاعدايدا كەلەسى كۇنى اۋرۋحانادان شىعارىلا بەرسە بولادى»، - دەيدى پروفەسسور.
ىنتالاندىرۋشى ەلەكترود يمپلانتى 10-12 جىل قىزمەت ەتەدى. ۋاقىت كەلگەندە قايتا اۋىستىرۋعا بولادى.
كارديولوگيا جانە ىشكى اۋرۋلار عىلىمي زەرتتەۋ ينستيتۋتىنىڭ باسقارما ءتوراعاسى مارات پاشيموۆتىڭ سوزىنشە، دارىگەرلەر جاقىن جانە الىس شەت ەلدەردەگى ءتۇرلى شەبەرلىك ساباقتارىنا ءجيى قاتىسادى.
«ءبىز جاڭا تەحنولوگيالاردى ەنگىزۋ ارقىلى زاماناۋي مەديتسينالىق ۇردىستەر مەن ستاندارتتاردى ۇستانۋعا تىرىسامىز. ماماندارىمىزدى جاقىن جانە الىس شەتەلدەردەگى ءتۇرلى شەبەرلىك ساباقتارىنا جىبەرىپ تۇرامىز. ۇزدىك دارىگەرلەرىمىز ءوز ارىپتەستەرىن ءبىزدىڭ ينستيتۋتتا جانە وڭىرلەرگە بارىپ وقىتادى. دەمونستراتسيالىق وپەراتسيالارىن جۇرگىزۋمەن تاجىريبە الماسۋ ماماندارعا كاسىبي قىزمەتتە قاجەتتى بىلىمدەرى مەن داعدىلارىن جەتىلدىرۋگە مۇمكىندىك بەرەدى»، - دەيدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.
ايتا كەتەيىك، جۇرەكتىڭ وتكىزگىش جۇيەسىنە ىنتالاندىرۋشى ەلەكترودتاردى يمپلانتاتسيالاۋ وپەراتسياسى مىندەتتى مەديتسينالىق ساقتاندىرۋ بويىنشا ناۋقاستارعا تەگىن جاسالادى.
