ۇلتتىق كينونى قولداۋ ورتالىعى وتكىزگەن اشىق كونكۋرس بويىنشا تەكسەرۋ تاعايىندالدى

استانا. قازاقپارات - ۇلتتىق كينونى قولداۋ ورتالىعى مەملەكەت قاراجاتى ەسەبىنەن تۇسىرىلەتىن كينو جوبالاردى ىرىكتەۋ ءۇشىن وتكىزگەن اشىق كونكۋرس بويىنشا تەكسەرۋ تاعايىندالدى.

بۇل تۋرالى پرەمەر-ءمينيستردىڭ ورىنباسارى التاي كولگىنوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا ءمالىم ەتتى، دەپ حابارلايدى قازاقپارات ءتىلشىسى.

«2023-جىلعى 22- مامىردا «ۇلتتىق كينونى قولداۋ مەملەكەتتىك ورتالىعى» كوممەرتسيالىق ەمەس اكسيونەرلىك قوعامىندا وتكىزىلگەن 2023-جىلعا ارنالعان كينو جوبالاردىڭ اشىق كونكۋرسىنا مينيسترلىكتە تەكسەرۋ جۇرگىزۋ كوميسسياسى قۇرىلدى. تەكسەرۋ جۇمىستارى قۇرىلعان كوميسسيا شەڭبەرىندە جۇرگىزىلەدى جانە ماسەلە ۋاكىلەتتى ورگاننىڭ تۇراقتى باقىلاۋىندا»، - دەپ جازادى التاي كولگىنوۆ.

سونداي-اق، ول بۇل ماسەلە بويىنشا مادەنيەت جانە سپورت مينيسترلىگى قانداي ۇستانىمدا ەكەنىن دە تۇسىندىرەدى.

«اشىق ىرىكتەۋدە قابىلدانباعان كينوجوبالاردىڭ 38 ءوتىنىش بەرۋشىنىڭ نەگىزگى قىزمەتى ەكونوميكالىق قىزمەت تۇرلەرىنىڭ جالپى جىكتەۋىشىنە سايكەس كەلمەۋى، 21 كينوجوبادا قۇجاتتار قاعاز تۇرىندە ۇسىنىلماعان جانە سەناريگە پاتەنتتىڭ جوق بولۋى، 94 كينوجوبادا دايەكسىز دەرەكتەر نەمەسە بۇرمالانعان اقپارات ۇسىنىلۋى (پاتەنت كينوجوبانىڭ اتاۋىنا سايكەس كەلمەيدى، كومپانيالاردىڭ سالىق بەرەشەگى بار، ءوتىنىش بەرۋشى ىسكە اسىرعان جوبالار تۋرالى راستايتىن قۇجاتتار جوق جانە ت. ب.) بويىنشا بۇزۋشىلىقتار انىقتالعان. سوندىقتان 153 جوبا قابىلدانباي، قايتارىلدى. بۇدان بولەك مينيسترلىك پەن ورتالىققا ىرىكتەۋگە وتپەگەن ءوتىنىم يەلەرىنىڭ 60 تان استام ارىزدارى ءتۇستى. ارىز يەلەرىنە رەسمي جاۋاپ بەرىلىپ، تۇسىندىرمە جۇمىستارى جۇرگىزىلدى»، - دەلىنگەن جاۋاپتا.