عالىمبەك ەلۋباي. حريستيان كەپتەرلەر- اڭگىمە

الماتى. بارلىق ۇيلەر بىزگە ەسىگىن ىشتەن قۇلىپتاپ الىپ اشقان جوق. شىن مانىندە ءبىز ول ۇيلەردىڭ ەشقانداي تانىسى دا، تۋىسى دا ەمەس ەدىك. ءبىز قالا ورتالىعىنداعى قاراۋسىز ساياباقتىڭ بۇرىشىندا ءبىر جامباستاپ قۇلاپ جاتقان لەنين ەسكەرتكىشىنە ارقامىزدى سۇيەپ وتىرىپ، كورەر تاڭدى كوزىمىزبەن اتىردىق.

كۇن شىعار الدىنداعى سالقىن ىزعار بويىمىزدى قالتىراتا باستاعان. قارت شاھاردىڭ بايىرعى تۇرعىندارى الەم- جالەم بەزەندىرگەن يتتەرىن جەتەكتەپ، باقتى شيرلاي باستاعاندا ءبىز ۇيقىلى- وياۋ ورنىمىزدان تۇردىق.

ول جىلدارى دالادا تۇنەپ جۇرگەن قاڭعىباستارعا جالپى جۇرت قۇرمەتپەن بولماسا دا ۇلكەن تۇسىنىستىكپەن قارايتىن ەدى. ءتىپتى تاڭعالمايتىن دا. يەسىز ءيت - مىسىققا قاراعانداي عانا جاناشىرلىق تانىتاتىن. بولسا ءبىر تال سارىمساعىن، بولماسا ءبىرىنىڭ باسىن ءبىرى يسكەپ ارقا-جارقا اراق ءىشىپ وتىراتىندار ءوز الدىنا ءبىر تايپا وكىلدەرى سىندى ەدى. ونىڭ ىشىندە بەدەلدى ۋنيۆەرسيتەتتىڭ بەلدى وقىتۋشىسىنان باستاپ، بۇرىنعى مال دارىگەرى، تىرامباي جۇرگىزۋشىلەرى بولۋشى ەدى.

- مەنى ءبىر القاش دەپ ويلاپ قالما باۋىرىم! مەن اۋەزوۆتىڭ الدىندا وتىرىپ، لەكسيا تىڭداۋ باقىتى بۇيىرعان از قازاقتىڭ ءبىرىمىن.

- مەنىڭ كۇنىم تىرامبايمەن بىرگە باتتى. قانداي داۋرەن ەدى! تاڭ بوزىنان مۇنتازداي كيىنىپ الىپ، الماتىنىڭ قولقا- جۇرەگىن سولقىلداتىپ تىرامبايدا وتىرعان ءساتىم!

- سەندەلىپ اۋىرىپ تۇرعان سيىرعا ساۋ سيىردى قوسىپ ايداپ، بازارلاتاتىن قايران كۇنىم!

ال ءبىز اۋىلىمىزدا قالعان ەسكى جاتاعان تامدارمەن، اقكوڭىل اۋىلداستارىمىز جايلى ايتاتىن ەدىك.

- اسپانى قانداي كىرشىكسىز ەدى التايدىڭ! ادامدارى سونداي ەدى! ەشكىم ەسىگىن ىلمەيتىن.

سول ءبىر قارعىس اتقىر سەنبى قالا كوشەلەرىندە جاڭاعى باقىتسىز ادامدار لەگى بولعان جوق. ۇشتى- كۇيلى ءبىر جاققا كوشىپ كەتكەن سياقتى. جىم- جىلاس. ءبىز كوشكەن ەلدىڭ جۇرتىندا قالعانداي قۇلازىعان بەتى باقتىڭ شەتىن الا ورنالاسقان شىركەۋ الدىنا كەلىپ وتىردىق. ايناداي سىپىرىلعان شىركەۋ اۋلاسىنان گۇلدەردىڭ حوش ءيسى مۇرىن جارادى. «قۇرىق- قۇرىق» ەتكەن سەمىز كەپتەرلەر عانا ءبىزدى اينالسوقتاپ جۇرگەنى بولماسا، ماڭىمىزدا جان بالاسى بولعان جوق. تاۋدان قالتاسىنداعى سوڭعى تيىندارىن ساناپ وتىر.

- باۋىرىم مەنىڭ ءبىر جوسپارىم بار.

- قانداي؟

- بۇگىن كەشكە كەپتەر قوناعاسى بولادى.

ول ورنىنان جەڭىل ىرعىپ تۇردى دا سامسا ساتاتىن دۇڭگىرشەككە تارتتى. قايتىپ كەلە جاتىپ بالاپان شىرشاعا بايلاعان قاپتى شەشىپ الدى.

ادەتتەگىدەي ورتاسىنان ءبولىپ، قاۋجاڭداپ الارمىز دەگەن سامسانى اسقان جومارتتىقپەن كەپتەرلەرگە ۇلەستىرە باستادى.

- ونىڭ نە ەي؟

- ءۇششش!

شىركەۋ ماڭىن مەكەندەپ، قۇداي ۇيىنە بەتتەگەن ادامداردىڭ ىقىلاسىنا بولەنىپ ۇيرەنگەن بەيعام قۇستار توپىرلاپ كەتتى.

تاۋدان وسى كەزدە جازىقسىز قۇستاردى بىتىرلاتىپ تەبە باستادى. العاشقى سوققىنىڭ وزىنەن بەس- التى كەپتەر ۇشىپ ءتۇستى.

- نە قاراپ تۇرسىڭ! سالساڭشى انداعى قاپقا!

مەن جاندارمەن شالا- جانسار كەپتەرلەردى قاپقا توعىتا باستادىم. تاۋدان ورىن اۋىستىرىپ، قولىنداعى جۇلىم- جۇلىم سامسانى قايتا ۇگىتەدى. كوگەرشىندەر قايتا جينالادى. قايتا تەبۋ. قاپ ورتان بەلىنە جاقىنداعان. وسى كەزدە بىزگە انادايدان ءبىر ورىس كەيۋانا جۇگىرىپ كەلە جاتتى.

- وسىلار قارتايسا نەگە كەپتەرگە ۇقساپ كەتەدى ەكەن ا؟

- اھ، جاۋىزدار! وڭباعاندار، - دەيدى تاماعى قارلىعىپ. - قالاي عانا وسىنداي قاتىگەز بولۋعا بولادى؟!

- قاشتىق!

قاشىپ كەلەمىز. يىعىمدا كەپتەر سالعان دوربا. ەستەن تانىپ قالعان قۇستار اقىرىن جان شاقىرىپ، قىبىرلاي باستاعان.

- تاۋدان مىنانىڭ تىرىلەرىن جىبەرە سالايىق!

- بولمايدى! ولارعا جانىڭ اشىماسىن!

- نەگە؟

- ولار تۇگەلىمەن حريستيان كەپتەرلەر!

سول كۇنى ءبىز قالا ماڭىنداعى ورمان اراسىندا ارتىقشا سەمىزدىگى جانە ءدىنى ءۇشىن ايىپتالعان بەيۋاز كوگەرشىندەردى ىستىككە ءىلىپ وتىردىق.

اۆتورى: عالىمبەك ەلۋباي