اقمولا وبلىسىندا بالالاردىڭ جازعى دەمالىسى قالاي ۇيىمداستىرىلماقشى
بۇل تۋرالى وبلىستىق ءبىلىم باسقارماسى باسشىسىنىڭ ورىنباسارى بوتاكوز دۇيسەنوۆا ءمالىم ەتتى، دەپ حابارلايدى قازاقپارات ءتىلشىسى.
باسقارما باسشىسى ورىنباسارىنىڭ ايتۋىنشا، قازىرگى ۋاقىتتا وبلىستا 1-10-سىنىپتاردىڭ 131045 وقۋشىسى بار، ونىڭ ىشىندە 17508 بالا - حالىقتىڭ الەۋمەتتىك وسال توپتارىنان، 397 بالا يۋۆەنالدى پوليتسيادا، 400 وقۋشى مەكتەپىشىلىك ەسەپتە، 878 كامەلەتكە تولماعان بالا تۇرمىسى ناشار وتباسىلاردا تاربيەلەنۋدە.
«بالالاردىڭ جازعى دەمالىسىن ۇيىمداستىرۋ ءۇش باعىت بويىنشا جۇرگىزىلەدى. قالا سىرتىنداعى دەمالىس 13 بالالار ساۋىقتىرۋ ورتالىعىنىڭ بازاسىندا جۇزەگە اسىرىلادى، ونىڭ 8 مەملەكەتتىك بولسا، 5 جەكەمەنشىك. مەملەكەتتىك لاگەرلەر اتباسار، اقكول، زەرەندى، بۋراباي، ەرەيمەنتاۋ، ساندىقتاۋ جانە سولتۇستىك قازاقستان وبلىسىنىڭ ايىرتاۋ اۋدانىندا جۇمىس ىستەيدى. جەكە لاگەرلەر بۋراباي جانە زەرەندى اۋداندارىندا ورنالاسقان. قالا سىرتىنداعى 13 لاگەر ءبىر ماۋسىمدا 2150 بالانى قابىلداي الادى. ياعني، جاز بويى بارلىعى 6-7 اۋىسىم ۇيىمداستىرىلادى، ونىڭ ءار بىرەۋىنىڭ ۇزاقتىعى 7-10 كۇندى قۇرايدى»، - دەپ بوتاكوز دۇيسەنوۆا.
باسقارما باسشىسى اتاپ وتكەندەي، مەملەكەتتىك لاگەرلەرگە جولدامانىڭ ورتاشا قۇنى 35-105 مىڭ تەڭگەنى، جەكەمەنشىككە - 90-110 مىڭ تەڭگەنى قۇرايدى. بيىلعى جىلعى جولداما قۇنى 2022 -جىلمەن سالىستىرعاندا 20-25 پايىزعا ءوسىپ وتىر.
جاز بويى رەسپۋبليكالىق جانە وبلىستىق قالا سىرتىنداعى لاگەرلەردە 12700 گە جۋىق اقمولالىق وقۋشىنى دەمالاتىن بولادى. بۇل رەتتە 1500 وقۋشى تەگىن دەمالادى.
«جالپىعا بىردەي ءبىلىم بەرۋ قورىنان جولداما ساتىپ الۋعا حالىقتىڭ الەۋمەتتىك وسال توپتارىنداعى بالالار ءۇشىن شامامەن 85,5 ميلليون تەڭگە قارجى جوسپارلانعان. قالا سىرتىنداعى لاگەرلەردە از قامتىلعان وتباسىلاردان شىققان بالالاردىڭ دەمالۋىنا بيۋدجەت تاپشىلىعى 1 ميلليون 280 مىڭ تەڭگەنى قۇرايدى. سونىمەن قاتار، جازعى كەزەڭدە وبلىستىڭ 450 وقۋشىسى «بالداۋرەن» رەسپۋبليكالىق ورتالىعىنىڭ فيليالدارىنا بارادى»، - دەپ تولىقتىردى بوتاكوز دۇيسەنوۆا.
سونىمەن قاتار، 5-ماۋسىمنان باستاپ الەۋمەتتىك وسال توپتاعى 150 بالا «زۆەزدنىي» بالالاردى ساۋىقتىرۋ ورتالىعى بازاسىندا ساۋىقتىرىلادى. ءبىلىم مينيسترلىگىمەن بىرلەسىپ «قازاقستان حالقىنا» قورىنىڭ قاراجاتىنان اقمولا وبلىسىنىڭ اۋىلدىق جەرلەرىنەن 5-8-سىنىپتاردىڭ 640 وقۋشىسىنا تەگىن دەمالىس ۇيىمداستىرۋ تۋرالى ماسەلە پىسىقتالدى. بۇل وقۋ ۇزدىكتەرى، شىعارماشىلىق جانە زياتكەرلىك بايقاۋلار مەن فەستيۆالدەردىڭ جەڭىمپازدارى. وسىلايشا، الەۋمەتتىك وسال توپتاردان 2100 وقۋشى قالا سىرتىنداعى دەمالىسپەن قامتىلاتىن بولادى.
«قالا سىرتىنداعى دەمالىسقا قوسىمشا 5-ماۋسىمنان باستاپ مەكتەپتەر جانىنان 70 مىڭعا جۋىق بالانى قامتيتىن مەكتەپ جانىنداعى 500-دەن استام الاڭ ۇيىمداستىرىلادى. الەۋمەتتىك وسال توپتاعى بالالارعا ارنالعان مەكتەپ جانىنداعى لاگەردە تاماقتانۋ مەملەكەتتىك قىزمەت ارقىلى بەرىلەدى، قالعان بالالار اتا-انالارىنا اقى تولەۋ ەسەبىنەن تاماقتانادى»، - دەپ تولىقتىردى بوتاكوز دۇيسەنوۆا.
سونىمەن بىرگە، ەلوردانىڭ 25 جىلدىعىنا ارنالعان ءىس-شارالاردى وتكىزۋ شەڭبەرىندە حالىقتىڭ الەۋمەتتىك وسال توپتارىنان 50 بالانىڭ استانا قالاسىنا ەكسكۋرسياعا شىعۋى ۇيىمداستىرىلماقشى.
ايتا كەتسەك، بۇدان بۇرىن بيىل اقمولا وبلىسىندا 60 ەلدى مەكەننىڭ ەسكى اتاۋى قايتارىلاتىنىن جازعان ەدىك.
