قازاقستان ە ا ە و شارتتارىن ورىنداۋعا دايىن - پرەزيدەنت

استانا. قازاقپارات - مەملەكەت باسشىسى قاسىم-جومارت توقايەۆ ەۋرازيالىق ەكونوميكالىق وداقتى دامىتۋدىڭ جاڭا باسىمدىقتارىن ايقىنداۋ قاجەتتىلىگى تۋرالى ايتتى، دەپ حابارلايدى قازاقپارات.

«ارينە، كەز كەلگەن ىستە وزەكتى ماسەلەلەرمەن اينالىسىپ قانا قويماي، كەلەشەكتەگى جۇمىستى دا جوسپارلاۋ قاجەت. سونداي-اق، اينالاداعى جاعدايدىڭ وزگەرۋىنە بايسالدى رەاكسيا ءبىلدىرۋ كەرەك. مۇنىڭ ءبارى مىقتى تىرەككە نەگىزدەلۋى كەرەك، ىرگەتاس نەعۇرلىم بەرىك بولسا، عيمارات سوعۇرلىم مىقتى بولادى. ءبىزدىڭ وداقتىڭ ىرگەتاسى نەدە؟ وداق تۋرالى شارتتى تولىق كولەمدە ىسكە اسىرۋ نەگىزگى ەلەمەنت بولدى جانە بولىپ قالا بەرەدى. تاعى دا ايتا كەتەيىن، قازاقستان 2015-جىلعى شارت نەگىزىندە ينتەگراتسياعا دايىن»، - دەدى قاسىم-جومارت توقايەۆ «كوپپوليارلى الەمدەگى ەۋرازيالىق ينتەگراتسيا» اتتى ەۋرازيالىق ەكونوميكالىق فورۋمدا.

ياعني پرەزيدەنت ەش كەمسىتۋسىز ينفراقۇرىلىمعا قول جەتكىزۋ، ءادىل باسەكە، تەڭدىك جانە ۇلتتىق مۇددەلەردى ەسكەرۋ سياقتى ءتورت بوستاندىق پەن نەگىزگى قاعيداتتاردى ىسكە اسىرۋ - بىرلەسكەن جۇمىستىڭ نەگىزگى قاعيداتتارى ەكەنىن اتاپ كورسەتتى.

«قازاقستان ءدال وسى قاعيداتتاردى ىلگەرىلەتەدى. ءبىزدىڭ بىرلەسكەن جۇمىسىمىزدىڭ بولاشاعى جاقسى دەپ ويلايمىن. بۇل ماسەلەلەردىڭ بارلىعى ارينە، اسا مۇقيات نازار اۋدارۋدى قاجەت ەتەدى»، - دەدى مەملەكەت باسشىسى.

ايتا كەتەيىك، قاسىم-جومارت توقايەۆ جوعارى ەۋرازيالىق ەكونوميكالىق كەڭەستىڭ وتىرىسىنا قاتىسۋ ءۇشىن ماسكەۋگە باردى.