جاھاندىق تاۋار اعىندارى ايتارلىقتاي وزگەردى - پرەزيدەنت

استانا. قازاقپارات - وتكەن جىلعى وقيعالار «سولتۇستىك- وڭتۇستىك» كولىك ءدالىزىن دامىتۋدىڭ ماڭىزدىلىعىن ايقىن كورسەتتى.

بۇل تۋرالى مەملەكەت باسشىسى قاسىم-جومارت توقايەۆتىڭ «كوپپوليارلى الەمدەگى ەۋرازيالىق ينتەگراتسيا» اتتى ەۋرازيالىق ەكونوميكالىق فورۋمىندا ايتتى، دەپ حابارلايدى قازاقپارات.

«راسىندا دا، ءبىز 2020-جىلى ەۋرازيالىق ەكونوميكالىق ينتەگراتسيانى دامىتۋدىڭ 2025-جىلعا دەيىنگى ستراتەگيالىق باعىتتارىن قابىلدادىق. نەگىزىنەن بۇل نە ىستەلگەنىن جانە نە بولاتىنىن باعامداۋ بولدى، ماقساتتار مەن مىندەتتەردى وزەكتەندىرۋدىڭ ءبىر ءتۇرى دەسە بولادى. ارينە، ە ا ە و- نىڭ وراسان زور گەوگرافيالىق اۋقىمىن نازارعا الا وتىرىپ، ينفراقۇرىلىمدىق بايلانىستى دامىتۋ اسا ماڭىزدى باسىمدىقتاردىڭ ءبىرى بولدى جانە بولا بەرەدى دە»، - دەدى قاسىم-جومارت توقايەۆ.

پرەزيدەنتتىڭ ايتۋىنشا، مۇندا بىردەن ەكى دەڭگەيدە: وداقىشىلىك - كولىك جانە كوممۋنيكاتسيا سالاسىنداعى قاتىسۋشى ەلدەردىڭ ينتەگراتسيا جەلىسى بويىنشا جانە حالىقارالىق - كولىك جانە لوگيستيكا سالاسىنداعى ءۇشىنشى ەلدەرمەن ىنتىماقتاستىقتى دامىتۋ جانە حالىقارالىق كۇن ءتارتىبىن ىسكە اسىرۋ شەڭبەرىندە جۇمىس جۇرگىزىلەدى.

سونداي-اق، ق. توقايەۆ جاھاندىق تاۋار اعىندارىنىڭ ايتارلىقتاي وزگەرگەن كورىنىسىن ەسكەرە وتىرىپ، قازىر بارلىق ايماقتا مۇمكىندىگىنشە جاڭا باعىتتاردى باقىلاۋ مەن قۇرۋ وتە ماڭىزدى ەكەنىن اتاپ ءوتتى.

«ءبىزدىڭ شىعىسىمىزدا كونتينەنتتىك ستراتەگيالىق بايلانىستى قۇرۋ جونىندەگى جارقىن جانە اۋقىمدى باستامالاردىڭ ءبىرى - قىتاي حالىق رەسپۋبليكاسىنىڭ» بەلدەۋ جانە جول» جوباسى.

سولتۇستىك-وڭتۇستىك جەلىسى بويىنشا ساۋدا-ەكونوميكالىق ءوزارا ءىس-قيمىلعا سۇرانىس بىرنەشە ەسە كۇشەيە ءتۇستى. ءبىز نەگىزىنەن وسى پروتسەستەردىڭ ورتالىعىندامىز. وتكەن جىلعى وقيعالار «جاڭا جاھاندىق لوگيستيكانىڭ» نەگىزگى ەلەمەنتى رەتىندە «سولتۇستىك-وڭتۇستىك» كولىك ءدالىزىن دامىتۋدىڭ ماڭىزدىلىعىن تاعى دا ايقىن كورسەتتى. بۇل مەريدياندىق ءدالىز ەندىك «ترانسكاسپي حالىقارالىق كولىك مارشرۋتىمەن» كەلىسىلەدى. سوندىقتان ءبىز ەكى مارشرۋتتىڭ ۇيلەسىمدى جانە جۇيەلى دامۋىندا ايتارلىقتاي سينەرگيانى كورەمىز»، - دەدى مەملەكەت باسشىسى.

ونىڭ ايتۋىنشا، بۇل ونەركاسىپ، كولىك جانە ەكونوميكا ءۇشىن ءوسۋ نۇكتەسى عانا ەمەس، بۇل مارشرۋتتار ۇلكەن ەۋرازيا ىشىندەگى ءوزارا ءىس-قيمىل مەن كووپەراتسيا دەڭگەيىن تۇبەگەيلى وزگەرتە الادى.