دەپۋتات ەگىس القاپتارى تاپتالعان شارۋالاردىڭ شىعىنىن وتەۋ ماسەلەسىن كوتەردى
«سوڭعى مالىمىتتەرگە سايكەس، كيىك سانى 2 ميلليوننان اسقان. ونىڭ 90 پايىزى قازاقستاننىڭ باتىسىندا. نەگىزىندە سالالىق مينيسترلىكتىڭ ەسەبى بويىنشا كيىكتەردىن سانى 750-770 مىڭنان اسپاۋى كەرەك ەدى. جايىلىمدىق جەردىڭ ءوزىن ايتپاعاندا، شارۋا قوجالىقتارى ماڭداي تەرىمەن ەككەن ەگىستىكتەردى كيىكتەر توبى ءبىر تاپتاپ وتكەندە- اق ميلليونداعان قارجىسى جەلگە ۇشادى. ماسەلەن، اقمولا وبلىسىندا جىلىنا 150 مىڭداي گەكتار ەگىن القابى بۇلىنەدى، ورتا ەسەپپەن 1 گەكتاردان 10 سەنتنەر ءونىم زايا كەتسە، سول ءوڭىردىڭ شارۋالارى 14 ميلليارد تەڭگە شىعىنعا ۇشىرايدى. نەسيەنى وتەي الماعان شارۋالار بانكروت بولادى. بۇنداي جاعدايدا ۇكىمەتتىڭ جايباسارلىعى تاڭ قالدىرادى. تاپتالعان ەگىستىككە قاتىستى شىعىننىڭ وتەۋى جوق. بۇعان مەنىڭ ەش قاتىسىم جوق دەپ، تەك سىرتتان عانا قاراپ قالاي وتىرا الامىز؟» ، - دەدى ا. زەينۋللين ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
ونىڭ ايتۋىنشا، ءتۇرلى سەبەپتەرمەن مەرت بولعان كيىكتەر دە كوپ كەزدەسەدى.
«كادەگە جاراتپاسا دا، قابىرعانى بەزەندىرەرمىن دەگەن ويمەن مەرت بولعان كيىك ءمۇيىزىن كەسىپ العاندار سوتتالىپ جاتىر، ونىڭ ىشىندە بىلمەستىك جاساعان جاسوسپىرىمدەر دە بار. بۇل جەردە زاڭ تالاپتارىن بۇزعانداردى جاقتاپ وتىرعانىمىز جوق. ماسەلەنى وسىنداي دەڭگەيگە دەيىن جەتكىزبەۋ كەرەك. بۇل جەردە كيىكتىڭ ەمەس، ادامنىڭ وبالىنا قالاتىن سياقتىمىز. ارينە بۇل دۇرىس ەمەس. قازاقستانعا كيىك ماسەلەسىمەن قانشاما شەت ەلدىك ساراپشىلار كەلگەنىمەن، ەشقانداي ناقتى شەشىم جوق»، - دەدى دەپۋتات.
ونىڭ پايىمىنشا، ۇكىمەت شارۋالاردىڭ شىعىنىن تولىق وتەپ بەرۋ تەتىگىن ەنگىزۋى كەرەك.
بۇدان بۇرىن حابارلانعانداي، 24-28-مامىردا حالىقارالىق ساراپشىلار قازاقستانداعى كيىك مەكەندەرىندە زەرتتەۋ جۇرگىزەدى.
جاقىندا ەكولوگيا جانە تابيعي رەسۋرستار مينيسترلىگى باتىس قازاقستانداعى كيىكتەردىڭ قىرىلۋىنا قاتىستى پىكىر ءبىلدىردى.
19-مامىر كۇنى ساعات 18:00 شاماسىندا باتىس قازاقستان وبلىسى جانىبەك اۋدانى كۇيگەنگۇل وكرۋگىنىڭ اۋماعى اشىوزەك وزەنىنىڭ جاعاسىنان جانىبەك تىرەك پۋنكتىنىڭ توبى 150 گە جۋىق كيىك ولەكسەسىن انىقتاعان.
جاقىندا پرەمەر- مينيستر ءاليحان سمايىلوۆ سەنات دەپۋتاتتارىنىڭ ساۋالىنا جولداعان جاۋابىندا كيىكتەرگە ارناپ سۋ قويمالارى سالىناتىنىن ايتتى.
قازاقستاندا كيىكتەردى قورعاۋ ءۇشىن 200 دەن استام ارنايى توپ قۇرىلدى.
