قازاقستان مەن تۇركيا اراسىندا كەدەن راسىمدەرى جەڭىلدەمەك: ءماجىلىس قۇجاتتى قابىلدادى

استانا. قازاقپارات - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن تۇركيا رەسپۋبليكاسىنىڭ ۇكىمەتى اراسىنداعى اقپارات الماسۋدى ۇيىمداستىرۋ جانە كەدەندىك باقىلاۋ راسىمدەرىن وڭايلاتۋ تۋرالى كەلىسىمدى راتيفيكاتسيالاۋ تۋرالى» زاڭى قابىلداندى، دەپ حابارلايدى قازاقپارات ءتىلشىسى.

اتالعان كەلەسىمگە 2022 -جىلعى 10-مامىردا قول قويىلعان.

«كەلىسىم مەملەكەتتەردىڭ اۋماقتارى اراسىندا وتكىزىلەتىن تاۋارلار مەن كولىك قۇرالدارى بويىنشا مالىمەتتەردى ەلەكتروندىق الماسۋ ارقىلى كەدەندىك باقىلاۋدى جۇرگىزۋدىڭ تيىمدىلىگىن ارتتىرۋ جانە مەرزىمدەرىن قىسقارتۋ ماقساتىندا جاسالدى. قۇجاتتىڭ ەرەجەلەرىنە سايكەس ەكى ەلدىڭ كەدەن ورگاندارى الدىن الا مالىمەتتەر الماسۋدى ىسكە اسىرۋعا جاۋاپتى جانە تىكەلەي بايلانىستاردى جۇزەگە اسىرۋعا ۋاكىلەتتىك بەرىلگەن قۇزىرەتتى لاۋازىمدى ادامداردىڭ ءتىزىمىن ايقىندايدى. سونداي- اق اقپارات الماسۋدىڭ تەحنيكالىق شارتتارىن ازىرلەيدى جانە پيلوت جوبانى ىسكە اسىرۋعا كىرىسەدى. وسى جۇمىستار اياقتالعاننان كەيىن، كەدەن ورگاندارى مالىمەتتەرمەن تۇراقتى نەگىزدە الماسۋدى باستايدى»، - دەدى پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ.

جالپى، كەلىسىم مەملەكەتتەر اراسىنداعى كەدەندىك راسىمدەردى جەڭىلدەتۋگە جانە وڭتايلاندىرۋعا باعىتتالعان.

«اتالعان كەلىسىمدى راتيفيكاتسيالاۋ ەلىمىز ءۇشىن تەرىس الەۋمەتتىك- ەكونوميكالىق جانە قۇقىقتىق سالدارلارعا اكەپ سوقتىرمايدى» ، - دەدى قارجى ءمينيسترى.

اۆتور:

رۋسلان عابباسوۆ