وسىمدىك رەسۋرستارىن كوممەرتسيالىق ماقساتتا پايدالانعاندار اقى تولەيدى
بۇل تۋرالى ق ر ەكولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى ەرلان قۇتپانبايەۆ ايتتى، دەپ حابارلايدى قازاقپارات ءتىلشىسى.
«وسىمدىكتەر دۇنيەسىن جالپى پايدالانۋ (جەكە جانە ۇيدە پايدالانۋ ءۇشىن اقىسىز) جانە ارنايى پايدالانۋ (كوممەرتسيالىق) تارتىبىمەن جۇزەگە اسىرىلاتىن بولادى. وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ جەرگىلىكتى وكىلەتتى ورگانىنىڭ شەشىمىمەن بەكىتىلگەن ليميتتەردە جەكە تۇلعالار جابايى جەمىستەردى، جاڭعاقتاردى، ساڭىراۋقۇلاقتاردى، جيدەكتەردى، دارىلىك شيكىزاتتى جانە باسقا دا وسىمدىك رەسۋرستارىن ءوز قاجەتىنە وتەۋسىز جيناۋعا قۇقىعى بار. جيناۋ نورماسى وسىمدىك دۇنيەسى مەن گەوبوتانيكالىق ماتەريالداردى تۇگەندەۋ جانە رەسۋرستىق زەرتتەۋ نەگىزىندە انىقتالادى»، - دەدى ە. قۇتپانبايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
سونىمەن قاتار ول 2024 -جىلعى 1-قاڭتاردان باستاپ وسىمدىكتەر دۇنيەسىن ارنايى تارتىپتە پايدالانعاندارعا (كوممەرتسيالىق) رەسۋرستار اقىلى بولاتىنىن ايتتى.
«تولەم مولشەرى وسى رەسۋرستاردىڭ تابيعي قورى، تارالۋى، قۇندىلىعى، رەسۋرستاردىڭ ونىمدىلىگىن ەسكەرە وتىرىپ بەلگىلەنەدى. وسىمدىكتەر دۇنيەسىن جەكە ماقساتتا پايدالانۋ تەگىن بولادى»، - دەدى كوميتەت وكىلى.
بۇدان بۇرىن حابارلانعانداي، بيىل 2- قاڭتار كۇنى مەملەكەت باسشىسى «وسىمدىكتەر دۇنيەسى تۋرالى» قازاقستان رەسپۋبليكاسىنىڭ زاڭىنا قول قويدى.
جاقىندا ق ر پرەمەر- ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ساڭىراۋقۇلاق پەن جەمىس- جيدەك تەرەتىندەرگە سالىق سالۋدىڭ جاڭا نورماسىنا قاتىستى تۇسىنىك بەردى. 2024 -جىلدان باستاپ ەلىمىزدە ساڭىراۋقۇلاق پەن جيدەك تەرگەنى ءۇشىن كەيبىر ازاماتتارعا سالىق قاراستىرىلعان.
«مۇنداي الىم ءتۇرى بۇرىن دا بولعان. وسىعان دەيىن بۇرىن وسى تالاپ تەك ەرەكشە قورعالاتىن ايماقتاردا، ياعني ۇلتتىق پارك، قورىقتاردىڭ اۋماعىندا تارالعان ەدى. ال ەندى بارلىق جەردە قولدانىلماق. ەكىنشىدەن، جاڭا نورمانىڭ قاراپايىم حالىققا قاتىسى جوق. بۇل تۇرعىدا سالىق ءونىمدى كوپ كولەمدە جينايتىن، دارىلىك پرەپاراتتار جاسايتىن نەمەسە كوممەرتسيالىق ماقساتتا پايدالاناتىن كاسىپكەرلەرگە قاتىستى»، - دەدى ە. جاماۋبايەۆ.
قازاقستاندا 1,5 مىڭعا جۋىق دارىلىك وسىمدىك بار.
