قۇتقارۋشىلار ايۋساي شاتقالىنان اۋستراليالىق تۋريستىڭ دەنەسىن تاپتى

الماتى. قازاقپارات - رەسپۋبليكالىق جەدەل- قۇتقارۋ جاساعى الماتى تاۋلارىندا جوعالىپ كەتكەن اۋستراليا ازاماتىنىڭ دەنەسىن ايۋساي شاتقالىنان تاپتى، دەپ حابارلايدى قازاقپارات ءتىلشىسى.

رەسپۋبليكالىق جەدەل- قۇتقارۋ جاساعىنىڭ مالىمەتىنشە، 21-مامىر كۇنى 1995 -جىلى تۋعان اۋستراليا ازاماتى ۇلكەن الماتى شاتقالىنا قاراي كەتكەن. پوليتسيا دەپارتامەنتىنە ونىڭ جوعالىپ كەتكەنىن حوستەلدە بىرگە تۇرعان رەسەي ازاماتى حابارلاعان.

ونىڭ ايتۋىنشا، ولار الماتىعا 20-مامىر كۇنى تاڭەرتەڭ تۋريستىك ماقساتتا كەلگەن. 22-مامىردا تاڭعى ساعات 7 دە تۋريستەر كەرى ۇشىپ كەتۋى كەرەك بولعان، ءبىراق قۇربىسى اۋەجايعا جالعىز بارىپتى.

ءتۋريستى ىزدەۋگە 6 ادامنان تۇراتىن رەسپۋبليكالىق جەدەل- قۇتقارۋ جاساعىنىڭ جەدەل قۇتقارۋ توبى جانە 1 كينولوگيالىق ەسەپ جىبەرىلدى، ساعات 23.40 تا ولار ىزدەۋگە كىرىستى.

ساعات 2:40 تا قۇتقارۋ جاساعى قىزمەتكەرلەرى مەن پوليتسيا دەپارتامەنتى قىزمەتكەرلەرى عارىش ستانتسياسىنا كوتەرىلىپ، بەتكەيدى تەكسەردى. ولار تومەن ءتۇسىپ، قۇبىردىڭ وڭ جانە سول جاعىن تەكسەردى. ولار كولدىڭ وڭ جاعىن قاراپ، جوعالعان ادامدى تاپپادى.

ۇلكەن الماتى كولىندە تۇندە اۋا رايى قولايسىز بولىپ، جاڭبىر، قار جاۋىپ، قاتتى جەل سوعىپ تۇردى. ساعات 10:45 تە تاعى ءبىر قۇتقارۋشىلار توبى اۋىسىمعا كەلدى، ولار ساعات 11:15 تە عارىش ستانتسياسىنان ىزدەۋدى جالعاستىردى.

قۇتقارۋشىلار ەكى توپقا ءبولىندى: ءبىر توپ ايۋساي شاتقالىنا، ەكىنشىسى پروحودنوە شاتقالىنا قاراي ىزدەۋگە شىقتى. ىزدەۋ كۇنى بويى، اۋا رايى قولايسىز بولسا دا جۇرگىزىلدى.

«ساعات 15:48 دە ت ج م رەسپۋبليكالىق جەدەل- قۇتقارۋ جاساعى جەدەل قۇتقارۋ بولىمشەسىنىڭ باسشىسى باۋىرجان ارىستانبايەۆ سپۋتنيكتىك بايلانىس بويىنشا اقپارات بەردى. رەسپۋبليكالىق جەدەل- قۇتقارۋ جاساعىنىڭ جەدەل قۇتقارۋ توبى الماتى قالاسى اكىمدىگىنىڭ قۇتقارۋ قىزمەتىمەن بىرلەسە وتىرىپ، ايۋساي شاتقالىنداعى العاشقى سارقىراما ماڭىنان دەنەنى تاپقان» ، - دەپ حابارلادى ت ج م ر ج ق ج باسپا ءسوز قىزمەتىنەن.