سينگاپۋر پرەزيدەنتىنە نازاربايەۆ ۋنيۆەرسيتەتىنىڭ قۇرمەتتى پروفەسسورى اتاعى بەرىلدى
پرەزيدەنت حاليما ياكوب 1978-جىلى سينگاپۋر ۇلتتىق ۋنيۆەرسيتەتىنىڭ زاڭ فاكۋلتەتىن ۇزدىك ءبىتىرىپ، 2001-جىلى سول وقۋ ورنىندا ماگيستر دارەجەسىن العان. ەڭبەك جولىن ۇلتتىق كاسىپوداق كونگرەسىندە باستاپ، باس حاتشىنىڭ ورىنباسارى، زاڭ قىزمەتتەرى دەپارتامەنتىنىڭ ديرەكتورى جانە ايەلدەردى دامىتۋ حاتشىلىعىنىڭ ديرەكتورى قىزمەتتەرىن اتقاردى. مانساپ بارىسىندا ول سونىمەن قاتار الەۋمەتتىك قىزمەتتەر ۇلتتىق كەڭەسىنىڭ كەڭەسشىسى جانە سينگاپۋردىڭ قوعامدىق دامۋ، جاستار جانە سپورت ءمينيسترى قىزمەتىن اتقارعان.
بۇگىن ەلورداداعى نازاربايەۆ ۋنيۆەرسيتەتىندە حاليما ياكوب «ارىستان قالادان - ۇلى دالاعا» تاقىرىبىندا ءدارىس وقىدى. ءوز سوزىندە سپيكەر ءدىن ماسەلەسىن دە كوتەرىپ، سينگاپۋردا ءارتۇرلى ءدىني، ەتنيكالىق توپتار بار ەكەنىن اتاپ ءوتتى.
«ءبىز ءار ادامنىڭ ءوزى ءۇشىن ماڭىزدى جانە قولايلى ءدىندى نەمەسە كونفەسسيانى تاڭداي الارىنا سەنەمىز. ءار ادام ءوز سەنىمىن تاڭداۋعا قۇقىلى. ءبىز ءدىني كوشباسشىلاردى شاقىرىپ، ءوز تاجىريبەلەرىمەن الماساتىن ارنايى شارالاردى ءجيى ۇيىمداستىرامىز. جاقىندا عانا ءبىز ۇكىمەتتىك ەمەس ۇيىمدار قاتىساتىن «گارمونيا» چەمپيوندار باعدارلاماسىن ىسكە قوستىق. بۇل باستامانىڭ ماقساتى - كونفەسسياارالىق ۇيلەسىمدە چەمپيون بولۋ»، - دەدى حاليما ياكوب.
سينگاپۋر پرەزيدەنتى قازاقستاننىڭ كوپدىندى، كوپكونفەسسيالى ديالوگتى ىلگەرىلەتۋدەگى تاجىريبەسىن مىسالعا كەلتىردى. قازاقستان جىلدار بويى الەمدىك ءداستۇرلى دىندەر كوشباسشىلارىنىڭ سەزىن وتكىزىپ كەلەدى. ونىڭ ايتۋىنشا، مۇنداي كونفەرەنتسيا 2019 جانە 2022-جىلدارى سينگاپۋردا دا وتكىزىلگەن.
«سينگاپۋردىڭ ىنتىماقتاستىق باعدارلامالارى اياسىندا بىزدە ازاماتتىق اۆياتسيا، قارجى جانە ت. ب. سالالاردا وتە جاقسى سەرىكتەستىك قاتىناستار ورناعان. بۇگىنگى دارىسكە شاقىرعاندارىڭىز ءۇشىن العىس ايتقىم كەلەدى. بۇل جەكە مەنىڭ ريزاشىلىعىم عانا ەمەس، قازاقستان مەن سينگاپۋر اراسىندا ارىپتەستىك قارىم-قاتىناستىڭ بار ەكەندىگىنىڭ بەلگىسى. ءبىز سىزدەرمەن بىرگە وسكەلەڭ ۇرپاق ءۇشىن جارقىن جانە گۇلدەنگەن بولاشاق قۇرىپ جاتىرمىز»، - دەدى حاليما ياكوب ءدارىس قوناقتارىنا.
ايتا كەتەيىك، سينگاپۋر پرەزيدەنتى حاليما ياكوب قازاقستانعا مەملەكەتتىك ساپارمەن كەلگەن ەدى.
سونداي-اق، قازاقستان-سينگاپۋر بيزنەس فورۋمى اياسىندا 275 ميلليون ا ق ش دوللارىن قۇرايتىن 12 قۇجاتقا قول قويىلدى.
