سينگاپۋر پرەزيدەنتى نازاربايەۆ ۋنيۆەرسيتەتىندە ءدارىس وقىدى

استانا. قازاقپارات - ەلورداداعى نازاربايەۆ ۋنيۆەرسيتەتىندە سينگاپۋر پرەزيدەنتى حاليما ياكوب «ارىستان قالادان - ۇلى دالاعا» تاقىرىبىندا ءدارىس وقىدى، دەپ حابارلايدى قازاقپارات ءتىلشىسى.

حاليما ياكوب ءوز سوزىندە سينگاپۋر مەن قازاقستان اراسىنداعى قارىم-قاتىناس كوشباسشىلاردىڭ ءوزارا ءىس-قيمىلىنا نەگىزدەلەتىنىن باسا ايتتى.

«ءبىز ءبارىمىز وركەندەۋگە ۇمتىلامىز، ونسىز ەكونوميكالىق ءوسۋ بولمايدى. وعان قوسا، ەلدەردىڭ ۇلكەن نەمەسە كىشى بولۋىنا قاراماستان، اناعۇرلىم ينكليۋزيۆتى ايماقتىق ارحيتەكتۋراعا ۇمتىلامىز. بىزدە ءتۇرلى ۇلتتىق كونتەكستتەر مەن ءارتۇرلى دامۋ قاجەتتىلىكتەرى بولعانىنا قاراماستان، ءبارىمىز بىردەي قۇقىقتارعا يە بولامىز. دەگەنمەن، ءبىزدىڭ ەلدەرىمىزدە ۇقساس تاجىريبەلەر مەن ۇقساس قيىندىقتار بار. مەن جۇرەگىمە وتە جاقىن ءۇش باعىت بويىنشا وي بولىسكىم كەلەدى. ءبىرىنشىسى - ءبىلىم. سينگاپۋر و باستا-اق ادام الەۋەتىن ارتتىرۋعا باعىتتالعان رەسۋرستاردى ينۆەستيتسيالادى. ءبىز سوڭعى جىلدارى جاستار ءبىلىم الا الاتىن جاعدايلاردى بارىنشا جاقسارتىپ كەلەمىز، ونى ءوز قاجەتتىلىكتەرىنە قاراي بارىنشا ىرىكتەيمىز. سونداي-اق ءبىلىم بەرۋ ىسىنە ءارتاراپتاندىرۋدى ەنگىزەمىز، وسىلايشا ستۋدەنتتەرىمىزگە ءبىلىم بەرۋدىڭ ەڭ قىزىقتى بولىگىن تاڭداۋعا مۇمكىندىك بەرەمىز»، - دەدى سينگاپۋر پرەزيدەنتى.

سونىمەن بىرگە، ح. ياكوب حالىقتىڭ وسال توپتارىنان شىققان ستۋدەنتتەرگە كومەكتەسۋ، وسىلايشا ولارعا ءوز الەۋەتىن ارتتىرۋعا جانە ونى اشۋعا مۇمكىندىك بەرۋ باستامالارى بار ەكەنىن جەتكىزدى.

«ءبىز مەكتەپتەردە ينكليۋزيۆتى كونتەكستكە ۇمتىلامىز، ءومىر بويى ءبىلىم الۋدىڭ ماڭىزدىلىعىن تۇسىنەمىز جانە ۇزدىكسىز وقىتۋ، بىلىكتىلىك باستامالارىن قولدايمىز. ءبىلىم بەرۋ ماسەلەسى قازاقستاننىڭ 2050-جىلعا دەيىنگى ستراتەگياسىنىڭ باستى بولىگى ەكەنىن ەستىگەنىمە قۋانىشتىمىن. سونداي-اق، قازاقستان-2025 ستراتەگياسى اياسىندا ينكليۋزيۆتى ءبىلىم بەرۋدىڭ كۇن ءتارتىبىن ىلگەرىلەتىپ، ءبىلىم بەرۋ ماسەلەسىنە ۇلكەن كوڭىل بولەتىنىن بىلەمىن. نازاربايەۆ ۋنيۆەرسيتەتى دە ستۋدەنتتەرگە پراكتيكادان وتۋگە جانە ءوز داعدىلارى مەن قۇزىرەتتەرىن قولدانۋعا مۇمكىندىك بەرەتىنىن بىلەمىن. مۇنىڭ ءبارى ەڭبەك نارىعىنىڭ قاجەتتىلىكتەرىنە ساي كەلەتىن ادامي كاپيتالدى دامىتۋدا وتە ماڭىزدى. جەكە ءوزىم ەكى ەل اراسىنداعى ستۋدەنتتەردىڭ، وقىتۋشىلار قۇرامىنىڭ كەز كەلگەن تاجىريبە الماسۋىن قۇپتايمىن»، - دەدى سينگاپۋر پرەزيدەنتى.

ايتا كەتەيىك، سينگاپۋر پرەزيدەنتى حاليما ياكوب قازاقستانعا مەملەكەتتىك ساپارمەن كەلدى.

سونداي-اق، قازاقستان-سينگاپۋر بيزنەس فورۋمى اياسىندا 275 ميلليون ا ق ش دوللارىن قۇرايتىن 12 قۇجاتقا قول قويىلدى.