كوشە تازالايتىن مامان: كولىك يەسىنىڭ نە ويلاپ بارا جاتقانىن قاباعىنان وقىپ وتىرام
استانا كوشەلەرىنىڭ شاڭىن باسۋ ءۇشىن سۋ شاشىپ جۇرەتىن كولىكتى تىزگىندەگەنىنە 10 جىلدان اسىپتى.
قىستا بۇل كولىكتەر تۇمسىعىنا كۇرەك ورناتىپ، قارمەن ارپالىسادى. «جۇمىستىڭ وڭايى جوق» قاعيداسىن ۇستاناتىن كەيىپكەرىمىز ەتى ۇيرەنىپ، اياق-قولى ماشىققان جۇمىسىن باسقا جۇمىسقا ايىرباستاۋدى ويلامايتىنىن ايتادى. باسقا ايتقاندارىن ءوز اۋزىنان ۇسىنىپ وتىرمىز.
قۋانىش ەلتايەۆ، «استانا تازالىق» ج ش س-نىڭ ارنايى تەحنيكا جۇرگىزۋشىسى:
مەن بۇل مەكەمەدە ارنايى تەحنيكا ايدايمىن. ول كولىككە قىستا قار كۇرەيتىن كۇرەك، جازدا سۋ شاشاتىن سەبەزگى قۇرال ورناتىلادى. كەيبىر تانىستار ازىلدەپ، كەيبىرى شىنداپ سۇراپ جاتادى: «كوشەنى جۋعاندا قانداي سابىن قوساسىڭدار؟»، - دەپ. ءبىز كوشە جۋمايمىز. ول - باسقا تەحنيكا. بىزدىكى قالانىڭ شاڭىن باسۋ ءۇشىن تەحنيكالىق سۋ سەبۋ عانا.
...2009 -جىلدان بەرى وسى مەكەمەدە جۇمىس ىستەپ ءجۇرمىن. «قالا تازالىعىنا جاۋاپتى ورىنعا جۇمىسشى الىپ جاتىر» دەگەن حابارلاما بويىنشا كەلگەن ەدىم. سودان بەرى تابان اۋدارعان جوقپىن. اۋەلى مەحانيزاتور بولىپ كىرگەنمىن. كەيىن وسى كولىككە اۋىستىم.
...ءبىر قاراعان ادامعا كولىك كابيناسىندا وتىرىپ، كەرەكتى تەتىكتى قوزعاپ قانا سۋ سەۋىپ شىعۋ وڭاي جۇمىس سياقتى كورىنۋى مۇمكىن. ءبىراق جۇمىستىڭ وڭايى بولمايتىنىن ەڭبەك ەتىپ كورگەن ادامنىڭ ءبارى بىلەتىن شىعار. بىزگە وتە مۇقيات بولۋ كەرەك. سۋ سەۋىپ كەلە جاتقاندا ارتىنا قاراماستان، الاڭسىز كەتىپ بارا جاتقان جۇرگىنشىلەر شىعادى. ۇستىنە سۋ شاشىراماس ءۇشىن سيگنال بەرىپ، نازارىن اۋدارتامىز دەگەن سياقتى. كولىگىن جاڭا عانا جۋدىرىپ شىققان كەيبىر جۇرگىزۋشىلەر ءبىز جانىنان سۋ شاشىپ وتكەندە قىنجىلعانىن قاراعان قاباعىنان كورىپ قالامىز. سۋمەن بىرگە كولىككە ۇساق تاستار شاشىراۋى مۇمكىن. ونى دا قاپەردە ۇستاۋ قاجەت. مۇقيات بولۋىمىز كەرەك دەگەنىم سول.
...قىستا كولىگىمە كۇرەك ورناتادى. ول جۇمىستىڭ ءوز قيىندىقتارى بار. ءبىراق جازدا جۇمىس وڭايلاپ، قىستا قيىندايدى دەپ ايتپاس ەدىم. جازداعى جۇمىس پەن قىستاعى جۇمىستىڭ ەش ايىرماشىلىعى جوق. كوشەنىڭ بويىنا قاڭتارىلعان كولىك قىستا قانداي كەدەرگى كەلتىرسە، جازدا دا سولاي جۇمىستى قيىنداتادى. جالعىز ايىرماشىلىق بار شىعار. جازدا كۇنگە كۇيىپ، «زاگار الامىز». ال قىستا توڭامىز. ايىرماشىلىعى سول عانا.
...ايلىق ماسەلەسى بىزدە جۇمىس ىستەگەن ۋاقىتقا بايلانىستى. اۋىسىمعا نەعۇرلىم ءجيى شىقساق، تابىس سوعۇرلىم كوبىرەك بولادى. كىمنىڭ دەنساۋلىعى مىقتى، وتباسىلىق جاعدايى وڭتايلى، ۋاقىتى مول بولسا، سول كوبىرەك شىعادى دەگەندەي عوي.
...ۇجىمدا جاستار ازداۋ. كوبىنەسە ورتا جاستاعى ادامدار جينالعانبىز. جاس دەگەندەرىڭ ءوزى 30 دان اسقاندار.
...استانالىقتارعا ءبىزدىڭ جۇمىسىمىزعا تۇسىنۋشىلىكپەن قاراساڭىزدار دەۋشى ەدىم. نە ىستەسەك تە، قالانىڭ تازالىعى ءۇشىن، تۇرعىندارعا قولايلى بولۋ ءۇشىن ىستەيمىز. قىستا جول بويىنا كولىك تاستايتىندار كوبەيەدى. سونىڭ سالدارىن ويلاسا ەكەن دەيمىز.
...قار ساعاتتاپ، تاۋلىكتەپ جاۋعان كەزدە جۇمىسقا سىن ايتۋشىلار كوبەيەدى. ءبىراق تولاسسىز جاۋعان قارمەن ارپالىسۋ وڭاي ەمەس. جاڭا عانا كۇرەپ كەتكەن جەرىڭدى قايتادان باسىپ تاستايدى. قىستا توقتاۋسىز جۇمىس ىستەيتىن كەزەڭدەر ءجيى بولادى. جالپى قىستا جۇمىس مازاسىز بولىپ كەتەدى.
ونداي كەزدەردە وسى جۇمىستان كەتۋ كەرەك دەپ جاتاتىن ارىپتەستەرىم بولادى. ول سوزدەر بىزگە دە وي سالادى. ءبىراق ادامنىڭ ويى قۇبىلمالى عوي. جۇرە بەرەسىڭ. باسقا جەرگە بارعاندا دا ءبارى ءبىر سونداي جۇمىس ىستەيسىز.
