قىرعىزستاننىڭ اسكەري پروكۋراتۋراسى كۇدەبايەۆتىڭ شەكارادان زاڭسىز وتۋىنە قاتىستى قىلمىستىق ءىس قوزعادى

استانا. قازاقپارات - قىرعىزستاننىڭ اسكەري پروكۋراتۋراسى قازاقستاندىق گەنەرال سەرىك كۇدەبايەۆتىڭ شەكارادان زاڭسىز وتۋىنە قاتىستى قىلمىستىق ىستە تەرگەۋمەن اينالىسىپ جاتىر.

بۇل تۋرالى 24.kg باسىلىمىنا قۇقىققورعاۋ ورگاندارىنداعى دەرەككوزدەر حابارلاعان.

الماتى وبلىسىنىڭ پوليتسيا دەپارتامەنتىنىڭ ەكس-باسشىسى قازاقستان-قىرعىزستان شەكاراسىنان زاڭسىز وتكەن. باسىلىم مالىمەتىنشە، بولجام بويىنشا كۇدەبايەۆ باقىلاۋ-وتكىزۋ پۋنكتىنىڭ بىرىندە شەكارا قىزمەتىنىڭ اسكەري قىزمەتشىسى ونىڭ قىرعىزستان اۋماعىندا بولۋىن زاڭداستىرعان.

«ارتىنشا كۇدەبايەۆ «ماناس» اۋەجايى ارقىلى تۇركياعا ۇشىپ كەتكەن. اسكەري پروكۋراتۋرا زاڭسىز كوشى-قون دەرەگى بويىنشا قىلمىستىق ءىس قوزعادى. قازىر بۇل ءىس بويىنشا ءتورت ادام ءوتىپ جاتىر. ولار بىشكەكتىڭ تەرگەۋ يزولياتورىنا قامالدى. الدىن الا اقپارات بويىنشا، قاتىسۋشىلاردىڭ ءبىرى - اسكەري قىزمەتشى، قالعان ۇستالعاندار قاراپايىم ازاماتتار»، - دەلىنگەن حابارلامادا.

ايتا كەتەيىك، بىلتىر ساۋىردە بىرنەشە ايماقتاعى پوليتسيا دەپارتامەنتتەرى مەن ۇ ق ك باسشىلارى قاڭتارداعى تارتىپسىزدىك بويىنشا كۇدىكتى دەپ تانىلدى. ەكى اپتادان كەيىن ءى ءى م باسشىسى سەرىك كۇدەبايەۆتى قىزمەتىنەن بوساتتى. سودان كەيىن ول ءوز ەركىمەن كەتكەنى تۋرالى حابارلاندى. ال مامىردا قاڭتار وقيعاسى بويىنشا كۇدىكتىلەر تىزىمىندە كۇدەبايەۆ تا بار ەكەنى بەلگىلى بولدى.

سونداي-اق، بيىل 5- قاڭتاردا ماجىلىستە الماتى وبلىسى پ د باستىعى سەرىك كۇدەبايەۆ ءتۇسىپ قالعان ۆيدەو كورسەتىلدى. كادرلاردا ول قارۋلى كۇزەتپەن ءوزى كۇزەتۋى قاجەت بولعان دەپارتامەنت عيماراتىنان كەتىپ بارا جاتادى.

28- ساۋىردە كۇدەبايەۆقا سوت ۇكىمى شىقتى. جەتىسۋ وبلىستىق سوتىنىڭ مالىمەتىنشە، سەرىك كۇدەبايەۆ 10 جىلعا باس بوستاندىعىنان ايىرىلدى. ول جازاسىن ورتاشا قاۋىپسىز مەكەمەسىندە وتەيدى.