قازاقستان ەۋروپالىق وداققا ازىق-تۇلىك ەكسپورتتاۋ بويىنشا كەلىسسوز جۇرگىزىپ جاتىر
بۇل تۋرالى ساۋدا جانە ينتەگراتسيا ۆيتسە-ءمينيسترى قايرات تورەبايەۆ ءمالىم ەتتى، دەپ حابارلايدى قازاقپارات ءتىلشىسى.
«وتاندىق ەكسپورتتاۋشىلار ءۇشىن جاڭا مۇمكىندىكتەر اشۋ بويىنشا جۇيەلى جۇمىستى جالعاستىرامىز. ماسەلەن، ناۋرىز ايىندا ەۋرو كوميسسيامەن كەلىسسوزدەر قورىتىندىسىندا بالىق ونىمدەرى ەكسپورتىن قايدا جانداندىرۋ تۋرالى ۋاعدالاستىققا قول جەتكىزىلدى. بال، ەت ونىمدەرى، قۇس ەتى جانە جۇمىرتقا ەكسپورتى بويىنشا كەلىسوزدەر پروتسەسى باستالدى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ۆيتسە-ءمينيستردىڭ اتاپ وتىنشە، تاجىكستان پرەزيدەنتىنىڭ تاياۋداعى ەلىمىزگە ساپارى اياسىندا 1,8 ميلليارد دوللاردان استام سوماعا 39 كوممەرتسيالىق كەلىسىم جاسالدى. ونىڭ ىشىندە 155 ميلليون دوللارعا تاجىكستان نارىعىنا وڭدەلگەن شيكىزاتتىق ءونىمدى جەتكىزۋ كوزدەلگەن. مۇنان بولەك، ساۋد ارابياسى نارىعىنا ەكسپورت شىعارۋعا مۇمكىندىگى بار كومپانيالار ءتىزىمىن كەڭەيتۋ جۇمىسى جالعاسىپ جاتىر. بۇل ەلگە نەگىزىنەن ەت پەن بال جەتكىزىلەدى.
«تاياۋدا عانا قىتايعا بۇرشاق پەن جاسىمىق، كۇنباعىس، ماقسارى، سويا جانە زىعىر ونىمدەرىن ەكسپورتتاۋ تۋرالى حاتتامالارعا قول قويىلدى. سالقىنداتىلعان ەت، قۇس ەتى جانە سۋبونىمدەر، جىلقى ەتى سىندى ونىمدەردى ەكسپورتتاۋدى باستاۋ بويىنشا كەلىسسوزدەر جۇرگىزىلۋدە»، - دەدى قايرات تورەبايەۆ.
