مەديتسينالىق ساقتاندىرۋ قورىنىڭ قىزمەتكەرلەرى قانشا ايلىق الادى

استانا. قازاقپارات - «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكسيونەرلىك قوعامىنىڭ باسقارما ءتوراعاسى ءسابيت احمەتوۆ قور قىزمەتكەرلەرىنىڭ ورتاشا ايلىعى قانشا ەكەنىن ايتتى، دەپ حابارلايدى قازاقپارات ءتىلشىسى.

«2022-جىلدىڭ قورىتىندىسى بويىنشا قور قىزمەتكەرلەرىن ۇستاۋعا 9 ميلليارد تەڭگەدەن استام قارجى كەتتى. بۇل - شامامەن 1 مىڭ ادامعا دەگەن ءسوز. ورتالىق اپپاراتتى قوسقاندا، اۋماقتىق بولىمشەلەردى، ەسەپتەگەندە وسىنداي. سونداي-اق، بۇكىل وبلىستارداعى فيليالداردا 700 دەي ادام جۇمىس ىستەيدى. ورتاشا ايلىق 450 مىڭ تەڭگەنىڭ شاماسىندا»، - دەدى ءسابيت احمەتوۆ جۋرناليستەردىڭ سۇراعىنا بەرگەن جاۋابىندا.

ونىڭ پايىمىنشا، قور ماماندارىنىڭ جۇمىسى وڭاي ەمەس ەكەنىن ەسكەرگەندە بۇل سونشالىق كوپ شىعىن دا ەمەس.

«سىزدەرگە بىردەن ايتايىن. بۇل سونشالىق ۇلكەن سوما ەمەس. ويتكەنى جىل سايىنعى مامانداردىڭ تۇراقسىزدىعى %22 بولادى. بۇل شامامەن جىل سايىن ءاربىر بەسىنشى ادام جۇكتەمەنىڭ اۋىر بولۋىنا بايلانىستى جۇمىستەن كەتەدى دەگەن ءسوز. جۇمىس كوپ بولعاندىقتان شىداماي كەتىپ جاتادى»، - دەيدى قوردىڭ باسقارما ءتوراعاسى.

سونداي-اق، ول ءوزى اتاعان قاراجاتتىڭ 80 پايىزدايى ەڭبەكاقى قورىنا جۇمسالسا، قالعانى وزگە دە شىعىندارعا كەتەتىنىن ايتتى.