قاسىم- جومارت توقايەۆ ق ح ر كومپانيالارىن قازاقستاندا اۆتوموبيل كلاستەرىن قۇرۋعا شاقىردى
پرەزيدەنتتىڭ ايتۋىنشا، اۆتوموبيل شىعارۋ ونەركاسىبى سياقتى عىلىمدى قاجەت ەتەتىن سالانى دامىتۋدىڭ بولاشاعى زور. وسى باعىتتا قازاقستان مەن قىتايدىڭ ىنتىماقتاستىعى ساپالى جاڭا دەڭگەيگە كوتەرىلىپ كەلە جاتىر. جەڭىل جانە جۇك كولىكتەرىنىڭ ءوندىرىسى قامتىلىپ، ەلەكتروموبيل شىعارۋ جوبالارى جۇزەگە اسىرىلدى.
سونىمەن قاتار قاسىم- جومارت توقايەۆ كەشە عانا قىتايدىڭ الدىڭعى قاتارلى كولىكتەرىن ەلىمىزدە قۇراستىرۋدى باستاۋ تۋرالى كەلىسىمگە قول قويىلعانىن ەسكە سالدى.
مەملەكەت باسشىسى قازاقستاندا ەلەكتر قۋاتىمەن زاريادتاۋ ستانسيالارىنىڭ ءتيىستى ينفراقۇرىلىمى بويىنشا جۇمىستار قامتىلعانىن ايتتى. قازاقستاندا ليتي، كوبالت، نيكەل جانە باسقا دا ماڭىزدى ەلەمەنتتەرىنىڭ ۇلكەن قورى بار. سوندىقتان ەلىمىز بۇل سالادا كەڭ اۋقىمدى ىنتىماقتاستىققا دايىن.
«قىتاي كومپانيالارىن قازاقستاندا ءىرى قىتايلىق برەندتەر شىعارىلىپ جاتقان وبلىستار اۋماعىندا اۆتوموبيل كلاستەرلەرىن قۇرۋعا شاقىرامىز. ءبىزدىڭ ۇكىمەت ىنتىماقتاستىقتى نىعايتۋ باعىتىندا ءتيىستى جاعداي جاسايدى»، - دەدى مەملەكەت باسشىسى.
بۇدان بۇرىن حابارلانعانداي، مەملەكەت باسشىسى قاسىم- جومارت توقايەۆتىڭ قىتاي حالىق رەسپۋبليكاسىنا جوسپارلانعان ساپارى قارساڭىندا «بايتەرەك» ۇلتتىق باسقارۋشى حولدينگىنىڭ باسشىلىعى كورشى ەلدەگى باودين قالاسىنداعى ءوندىرىس نىساندارىن ارالادى.
