توقايەۆ قىتاي ينۆەستورلارىن كاسپي پورتىنىڭ مۇمكىندىگىن بىرلەسىپ كەڭەيتۋگە شاقىردى

استانا. قازاقپارات - پرەزيدەنت قاسىم- جومارت توقايەۆ «ورتالىق ازيا- قىتاي» سامميتىندە قىتايلىق ينۆەستورلاردى كاسپي پورتتارىنىڭ مۇمكىندىگىن بىرلەسىپ كەڭەيتۋگە ۇندەدى، دەپ حابارلايدى قازاقپارات ءتىلشىسى.

«ترانسكاسپي حالىقارالىق كولىك مارشرۋتى قىتاي - ورتالىق ازيا - ەۋروپا» مارشرۋتىنىڭ نەگىزگى بولىگىنىڭ ءبىرى بولىپ ەسەپتەلەدى. قازىرگى كەزەڭدە بۇل تاسىمال وزەگى ستراتەگيالىق مانگە يە بولىپ تۇر. ءبىز ونىڭ وتكىزۋ قابىلەتىن ينفراقۇرىلىمدى جاڭعىرتىپ، سيفرلىق شەشىمدەر ارقىلى ارتتىرۋعا نيەتتىمىز»، - دەدى مەملەكەت باسشىسى.

قاسىم- جومارت توقايەۆ قىتاي بۇل ايماقتاعى نەگىزگى جۇك جونەلتۋشى ەل ەكەنىن ەسكە سالدى.

«وسىنى ەسكەرسەك، اتالعان مارشرۋتتىڭ ىركىلىسسىز ءارى ماكسيمالدى ماندە جۇكتەلۋىن قامتاماسىز ەتۋ ءۇشىن بىرلەسكەن كۇش- جىگەرىمىزدى بەلسەندى ەتە ءتۇسۋ كەرەك دەپ ەسەپتەيمىز. قىتايلىق ارىپتەستەرىمىزدى كاسپي تەڭىزىندەگى پورتتاردىڭ مۇمكىندىگىن كەڭەيتۋدە، ولاردىڭ قىزمەتىن سيفرلاندىرۋدا، سونداي- اق، تاسىمالداۋشى كەمەلەردى بىرلەسىپ وندىرۋدە ءوزارا ءتيىمدى ارىپتەستىككە شاقىرامىز. ءبىزدىڭ ەلدەر ءۇشىن «قازاقستان - تۇرىكمەنستان - يران» تەمىرجولىنىڭ كەلەشەگى زور. بۇل ماگيسترال شىعىس ازيادان پارسى شىعاناعىنا اپاراتىن قىسقا جولداردىڭ ءبىرىن دامىتۋداعى ماڭىزدى بۋىن بولا الادى»، - دەدى پرەزيدەنت.

پرەزيدەت بۇگىنگى جيىن بارىسىندا ايتقان ۇسىنىستارى مەملەكەتتەردىڭ قارىم- قاتىناسى مەن ىنتىماقتاستىعىن نىعايتۋ باعىتىنداعى قازاقستاننىڭ ۇمتىلىسىن راستايتىنىن ايتتى. وسى ورايدا ءوزارا ءتيىمدى سەرىكتەستىكتىڭ ستراتەگيالىق باعىتىن تۇراقتى تۇردە جالعاستىرۋ ماڭىزدى.

بۇل تۇرعىدا قاسىم- جومارت توقايەۆ سامميت كەزىندە جاريالانعان ۇسىنىستار شيان دەكلاراتسياسىندا قامتىلاتىنىنا سەنىم ءبىلدىردى.

«قازاقستان «ورتالىق ازيا - قىتاي» حاتشىلىعىن قۇرۋ يدەياسىن قولداپ وتىر. قىتاي اۋماعىندا حاتشىلىق جۇمىسىنىڭ باستالۋىنا قارسى ەمەسپىز، بۇل قيسىندى بولار ەدى. سونىمەن قاتار، «ورتالىق ازيا- قىتاي» ەكىنشى ءسامميتىن قازاقستاندا وتكىزۋگە دايىن ەكەنىمىزدى ايتقىمىز كەلەدى»، - دەدى مەملەكەت باسشىسى.

پرەزيدەنت قاسىم- جومارت توقايەۆ «ورتالىق ازيا- قىتاي» سامميتىندە ورتالىق ازيا ەلدەرى مەن قىتاي اراسىندا تاسىمالداناتىن تاۋاردى قازاقستاندىق قويمالاردا ساقتاۋدى ۇسىندى.

«جالپى ءوزارا ساۋدا- ساتتىقتى ارتتىرۋ الەۋەتىن ەسكەرسەك، قازاقستان جاڭا كەدەن قويمالارىن قۇرۋ باعىتىندا بەلسەندى جۇمىس ىستەپ جاتىر. وسىعان بايلانىستى لوگسيتيكاداعى قولايلىلىق ءۇشىن بۇكىل ارىپتەستەرىمىزگە ءوز تاۋارلارىن ءبىزدىڭ قويمالارعا ورنالاستىرۋدى ۇسىنامىز. بۇل ورتالىق ازيا مەن قىتاي اراسىندا تاسىمالداناتىن تاۋارلاردىڭ جەتكىزۋ مەرزىمىن ەسەلەپ قىسقارتادى»، - دەدى پرەزيدەنت.

قاسىم- جومارت توقايەۆ بۇل ءىستى ارنايى پلاتفورما ارقىلى جولعا قويۋعا بولاتىنىن اتاپ ءوتتى.

«بۇل جۇمىستى «С5+Сhina» ءبىرىڭعاي ەلەكتروندى ساۋدا پلاتفورماسىن قۇرۋ ارقىلى ۇيلەستىرۋگە بولادى»، - دەدى مەملەكەت باسشىسى.