قازاقستان مەن قىتاي ازاماتتارىنىڭ ۆيزاسىز ءجۇرۋى ىسكەرلىك بايلانىس اياسىن كەڭەيتەدى - قاسىم- جومارت توقايەۆ

شيان. قازاقپارات - قىتايدا ءوتىپ جاتقان ءبىرىنشى «ورتالىق ازيا - قىتاي» سامميتىندە ق ر پرەزيدەنتى ايماقتىڭ ەكولوگيالىق احۋالىنا الاڭداۋشىلىق ءبىلدىردى، دەپ حابارلايدى قازاقپارات.

«جەتىنشى، ترانسشەكارالىق سۋ رەسۋرستارىن ءتيىمدى پايدالانعان ءجون. «ورتالىق ازيا ەلدەرىنىڭ تۇشى سۋ تاپشىلىعىنا ۇشىراۋ قاۋپى جوعارى ەكەنى بەلگىلى. 2050 -جىلعا قاراي 5 ميللياردتان استام ادام اۋىز سۋعا مۇقتاج بولۋى مۇمكىن. بۇل - بىرىككەن ۇلتتار ۇيىمىنىڭ دەرەگى. ساراپشىلار ءبىزدىڭ ايماعىمىزدىڭ تەز جىلىنىپ بارا جاتقانىن ايتىپ وتىر.

كليماتتىڭ وزگەرۋىنە بايلانىستى ءبىزدىڭ ايماقتىڭ باستى سۋ كوزى سانالاتىن مۇزدىقتار دا كۇرت ازايىپ بارادى. وسى جاعداي ورتالىق ازيانىڭ ازىق- تۇلىك، ەنەرگەتيكا جانە ەكولوگيا قاۋىپسىزدىگىنە ەداۋىر قاتەر توندىرەدى. سوندىقتان بىرلەسىپ شۇعىل شارالار قابىلداۋىمىز قاجەت»، - دەدى قاسىم- جومارت توقايەۆ.

ول سەگىزىنشى ماسەلە رەتىندە مادەنيەت جانە ءبىلىم سالاسىنداعى ىنتىماقتاستىقتى، سونداي- اق تۋريزمدى دامىتۋدى كوتەردى.

«جەكە ادامداردىڭ قارىم- قاتىناسى مەملەكەتارالىق بايلانىستاردى نىعايتۋعا سەپتىگىن تيگىزەرى ءسوزسىز. قازاقستان مەن قىتاي ازاماتتارىنىڭ ەكى ەل اراسىندا 30 كۇنگە دەيىن ۆيزاسىز جۇرۋىنە مۇمكىندىك بەرەتىن ۇكىمەتارالىق كەلىسىمگە قول قويىلدى. بۇل قۇجات ىسكەرلىك بايلانىس اياسىن كەڭەيتىپ، تۋريستەر لەگىن ارتتىرۋعا ىقپال ەتەدى دەپ سەنەمىن. ورتالىق ازيا ەلدەرىنىڭ مادەنيەتى - باي، كورىكتى جەرلەرى دە - كوپ. سونىڭ ءبارى قىتايلىق تۋريستەر ءۇشىن قىزىقتى بولارى انىق. وسى ورايدا مەن «جىبەك جولى» تۋريستىك وپەراتورلارىنىڭ ءتىزىمىن جاساۋدى ۇسىنامىن. توپتىق تۋرلار ءۇشىن ۆيزاسىز رەجيم ەنگىزىپ، ءبىرىڭعاي تۋريستىك كلاستەر قۇرۋ قاجەت. سول كەزدە قىتاي تۋريستەرى ءبىر ساپاردا ورتالىق ازيانىڭ بىرنەشە ەلىنە بارا الادى»، - دەدى مەملەكەت باسشىسى.